Anda di sini

JPBM: 14 kes rumah panjai angus ari bulan Januari-3 September taun tu

KUCHING: Dalam timpuh ari bulan Januari ngagai 3 September taun tu, Opis Bomba enggau Penyelamat Malaysia (JBPM) Nengeri Sarawak ngerikodka 14 kes penusah angus rumah panjai.

Bepelasarka Penerang Berita ari JBPM Nengeri Sarawak kemari, ari 14 kes penusah angus nya udah nganguska 181 pintu tauka 53 peratus ari 341 pintu ti dituntung penusah nya.

“Penusah angus rumah panjai (14 kes) tu udah ngujungka lebih 1,300 iku peranak rumah panjai nadai endur diau.

“Ari 14 kes penusah angus nya bisi 12 kes udah ditemu kebuah ke angus lalu lapan kes ketegal aktiviti berapi enggau empas kes ketegal wayar sot. Lalu dua kes benung dipansik,” ku JBPM Nengeri Sarawak.

Nitihka statistik ari JBPM Nengeri Sarawak kes penusah rumah panjai angus nya nyadi ba Bagi menua Sri Aman bisi dua kes; Betong (tiga kes); Sarikei (dua kes); Mukah (siti kes); Sibu ( dua kes); Bintulu (dua kes) enggau di Miri dua kes.

Bepelasarka rikod opis nya, bisi 12 kes penusah angus rumah panjai penyauh 30 kilometer ngagai 187 kilometer ari Balai Bomba ke pemadu semak.

Ari 12 kes nya bisi sembilan kes 100 peratus angus enggau tiga kes angus baruh ari 10 peratus laban mujur dipadamka peranak rumah panjai ngena kereban pengerara api.

Lalu dua kes agi, rumah panjai nya penyauh kurang 15 kilometer ari Balai Bomba ke pemadu semak sereta semina nganguska 20 peratus enggau 1 peratus aja.

“Anggar penyampau pengerugi ba 12 kes ketegal penusah angus nya iya nya sepenyampau RM10,116,500 enggau penyampau reta tengkira ti mujur diselamatka iya nya sepenyampau RM12,993,500.

“Lalu dua kes benung dipansik opis bomba.

“Naka ke diatu, semina siti pemati (OKU indu beumur 43 taun) enggau empat bakal dirikodka ketegal penusah angus bekaul enggau rumah panjai sepemanjai taun 2019,” ku JBPM Nengeri Sarawak.