KUCHING: Semua rumah panjai di nengeri tu patut bisi bungkur insurans dikena nyaga peranak rumah pan jai nya ari sebarang penusah ngenyit baka angus, pia ku Sapit Kepala Menteri Sarawak Datuk Douglas Uggah.
Ku iya, Allianz General Insurance Company (Malaysia) Berhad udah numbuhka siti pelin bungkur insurans ungkup rumah panjai.
Ku iya baru, pelin insurans nya tau ditanya ba Pos Malaysia Berhad sereta enda mar bayar, lalu tuai rumah panjai ke bisi ati tau ngelawa opis pos ke besemak sereta betanyaka pekara nya.
Iya madah munyi nya ngagai pengarang berita pengudah nerima penemuai basa menijar dagang pelilih menua Pos Malaysia Sawing Bajing enggau eksekutif dagang Allianz General Insurance, Vera Phang Lee Ping ba opis iya seraya meri penerang ngagai iya sentang pelin insurans nya.
Uggah madahka pelin nya manah ungkup rumah panjai laban premium ninting taun semina RM75 setaun ungkup penyampau bungkur RM10,000 ti nyengkaum penusah angus enggau penusah ngenyit baka ampuh bah enggau biau balai.
“Kelimpah ari nya mega bisi meri bungkur ngagai tetiap iku ke nguan rumah panjai. Pinta penetap nya amat patut, peranak rumah panjai patut meli insuran ke reta sida,” ku iya.
Ku Uggah, pelin nya patut endar diperundingka laban sitak ti diarika iya, Kunsil Nengeri Bukit Saban bisi 94 buah rumah panjai.
Nitihka statistik Opis Pengerara Api enggau Penyah Penusah bisi 12 penusah angus nyadi di rumah panjai di serata nengeri taun tu nyentuk keujung bulan siti nyin tadi lalu bisi 24 rumah panjai angus lengis ba taun siti nyin tadi.
Bisi 70 penusah ang us nya di ketegal wayar sot lalu ke bukai nya ketegal pengilap maya ngena kereban nyumai. — Bernama