Anda di sini

Indu Opis FORUM deka nyadi rumah ikon ngagai raban bansa Orang Ulu

Advertisement
 Gerawat (tiga ari kanan) disempulang (ari kanan) Ipoi, Liwan sereta (ari kiba) Paulus, Antonio enggau (ari belakang, kiba) Chukpai enggau Anyi, ngayanka langkar perambu rumah Indu Opis FORUM, kemari. — Gambar Chimon Upon
IKON ORANG ULU: Gerawat (tiga ari kanan) disempulang (ari kanan) Ipoi, Liwan sereta (ari kiba) Paulus, Antonio enggau (ari belakang, kiba) Chukpai enggau Anyi, ngayanka langkar perambu rumah Indu Opis FORUM, kemari. — Gambar Chimon Upon

KUCHING: Indu Opis Persekutuan Persatuan Orang Ulu Sarawak Malaysia (FORUM) deka nyadi rumah ikon ngagai raban bansa Orang Ulu enti nya udah tembu jemah ila.

Penyanding Penemu FORUM, Datuk Gerawat Gala madah dikena nyapai juluk nya perintah nengeri mantu sereta ngungkupka RM25 juta enggau sebidang tanah dikena ngaga sereta ngemansangka rumah Indu Opis FORUM di Miri.

Nitihku iya bantu tauka ungkup belanja nya disemaya Kepala Menteri Datuk Patinggi Abang Johari Tun Openg maya bejadi pengawa nutup Simposium Budaya Orang Ulu Ke-7 bulan November 2018 di Miri.

“Kami amat beterima Kasih ngagai YAB Kepala Menteri Datuk Patinggi Abang Johari Tun Openg ti mega udah ngemendarka sebidang tanah di Miri urung  lima ekar dikena ngaga rumah Indu Opis FORUM.

“Ungkup belanja dikena ngaga rumah nya iya udah ngemendarka RM25 juta, lalu sehari tu (kemari) pengawa nyuaka RM10 juta ari RM25 juta, ngambika kami ulih berengkah bejalaika projek.

“Ke diatu kami agi nganti pemendar ari Opis Bekuasa Perambu Nengeri (SPA) bekaul enggau endur sereta rumah, enti udah dikemendarka magang kami deka berengkah enggau proses tinda.

“Kami (FORUM) enggau raban bansa Orang Ulu ngarapka Indu Opis FORUM deka nyadi rumah ikon ngagai Orang Ulu, deka ngarika komuniti kami Orang Ulu sereta pesaka kami,” ku iya ti bejaku ngarika FORUM lebuh dikerandau raban pengarang berita.

Dulu ari iya enggau raban FORUM meri penemui basa ngagai Abang Johari ba opis iya di Wisma Bapa Malaysia ditu, kemari.

Nitihku Gerawat langgur sereta juluk sida iya deka ngatur pengerami nasih tanah endur ngaga rumah nya dalam bulan April tauka Mei 2020, lalu Abang Johari dikangau bejadika pengerami nya.

Ku iya rumah Indu Opis FORUM nya deka digaga ba tengah mengeri Miri sereta dilpelabaka muat alai 700 ngagai 800 iku orang ba sesiti pengerami.

Rumah dua ringkat nya deka disikap enggau balai mayuh guna ti dijaga semilan kaban gerempung ari baruh FORUM kelimpah ari bisi rumah galeri ti endur ngayanka pesaka enggau sejarah raban bansa Orang Ulu, ku iya kelimpah ari bisi padang ke ulih endur ngatur aktiviti lumba enggau main sereta main asal.

Kelimpah ari nya Gerawat ti mega Sapit Speaker Kunsil Nengeri enggau ADUN Mulu ngenang maya simposium ke sama taun 2018, YAB Kepala Menteri mega besemaya meri geran RM10 juta dikena numbuh sereta ngemansangka Balai Dagang enggau Industri Orang Ulu.

“Ke diatu kami agi nganti Opis Pengerejista Gerempung ngemendarka balai dagang enggau industri gerempung Orang Ulu,” ku iya seraya beterima kasih ngagai Kepala menteri meri geran dikena nyukung projek nya.

Sama meri penemuai basa kemari, Presiden FORUM Antonio Kahti Galis, Sapit Presiden Ipoi Datan, Menteri Muda Bekal Ai Datuk Liwan Lagang, ADUN Telang Usan Dennis Ngau, ADUN Batu Danau Paulus Palu Gumbang, ADUN Murum Chukpai Ugon, Kaban Parlimen Baram Anyi Ngau enggau ke bukai.

Advertisement