Anda di sini

Ubah chara ngajar ngagai chara ngena teknologi enggau internet

Advertisement
 Manyin (tengah) berandau enggau sekeda ari pesereta ICEdDE 2019 ke berengkah kena 19 - 22 Ogos di Kuching. — Gambar Chimon Upon
NERANG: Manyin (tengah) berandau enggau sekeda ari pesereta ICEdDE 2019 ke berengkah kena 19 - 22 Ogos di Kuching. — Gambar Chimon Upon

KUCHING: Bala pengajar di nengeri tu dipinta ngambi chara ke manah berindik pengerembai guna teknologi dalam pelajar.

Kepala Menteri Datuk Patinggi Abang Johari Tun Openg madah, sekula enggau palan pelajar tinggi diatu di serata dunya landik ba teknologi.

Nya alai ku iya, serata dunya nyengkaum Malaysia seruran ngangkatmanah chara belajar ngambika meruan relevan.

“Ukai semina menua maju tang mega menua ke benung mansang maju enggau ke bedau maju ngubah ari chara lama ngagai chara ngena teknologi sereta internet.

“Bala pengajar mega ngena pelajar ke engkeman lebuh ke ngajar ngena chara belajar betunga mua sereta nengah ‘online’.

“Chara tu deka nyemelaka pelajar ngambika nembiak sekula di sekula mengeri enggau menua pesisir nerima kualiti pelajar ke sama,” ku iya.

Iya madah munyi nya ba jaku bejadi iya beserimbai enggau Aum Antarabansa Keterubah Pelajar Dalam Ekosistem Digital (ICEdDE) ke diatur ditu kemari.

Teks jaku iya dibacha Menteri Pelajar, Sains enggau Pansik Teknologi, Dato Sri Micheal Manyin Jawong.

Tambah Abang Johari, rebak biak kemaya hari tu patut diperansang nyapai pelajar nuju jeman digital.

Nya kebuah, perintah Sarawak agresif ngena teknologi baru ngemansangka ekosistem digital.

“Sistem pelajar udah dikelala nyadi siti ari tujuh ‘Bidang Keberhasilan Utama’ sereta ngena ekosistem digital nempa modal mensia ke bekualiti enggau bepengelandik sereta bisi penau.

“Sida tu deka nyadi ‘injin’ ke deka nunjukka jalai lalu ngerembaika Sarawak ngagai tikas ke tinggi agi,” ku iya.

Abang Johari ngarapka pengelicha enggau pelatih pengajar ke ngambi bagi aum tu bulih peransang pengudah aum tu lalu neruska tanggungpengawa sida nyikap bala nembiak sekula ngena pengelandik digital ungkup Revolusyen Digital 4.0 (IR 4.0).

Perintah Sarawak ku iya, komited deka mantu enggau ngembing bala nembiak nuju dunya digital dikena nentuka sida disikap ngena pengelandik sereta penemu ke pemadu baru.

Advertisement