KUCHING: Aum Komiti Mutar Penusah Ngenyit Nengeri ke diatur kemari, udah ngerintaika lima atur pelin dikena napi maya kemarau, ti dipelaba nyadi nyentuk ujung Oktober tu.
Menteri Pengelantang Pendiau Komuniti, Orang Indu,Ruang Bilik enggau Anak Mit, Datuk Seri Fatimah Abdullah madahka antara atur pelin dikena napi kemarau iya nya ngenalamka Sungai Bayai di Batang Undup enggau nekat ai ngena guni pasir dikena nambahka paras ai mata ba sungai.
“Kelimpah ari nya, muai rau sereta ngenalamka ‘Slump Raw Water’, nganjung lori tanker di Sri Aman ( ngagai palan ke suntuk ai) lalu kepenudi endar, nyendiaka palan ngambil ai sba (flat Perintah Nengeri di Jalai Kedang enggau Opis JKR Sri Aman),” ku iya ba aum media ditu kemari.
Berebak enggau nya, ngenang pasal kampung angus enggau sebun asap di Sarawak, Cha irman Mutarka Penusah Ngenyit Nengeri, Datuk Amar Douglas Uggah Embas m adahka penyampau titik angat ke ditemu bisi 26 titik iti, ke alai pemadu mayuh di Miri ke bisi tujuh iti titik angat.
“Bacha IPU (Indeks Pengamah Angin) di ILP Miri enggau SK Kuala Baram 2 udah ngerikod bacha IPU ke balat kamah, lalu di Sri Aman ngerikod bacha enda manahka pengerai sereta ba stesyen bukai jelan iya pemanah” ku iya.
Uggah ke mega Sapit Kepala Menteri madah,penusah angus nyadi ketegal gaya hari El-Nino, sebun asap entara menua, gaya angin ke balat ti enda dijangka nyadi enggau tanah ke enda dikemansang nya besai ti angus ninting taun.
Berebak enggau nya, lebuh ke ngenang pasal nutup sekula ketegal sebun asap, Uggah madahka pekara nya semina tau diputuska Kepala Pengajar sekula nya.
“Enti nitihka SOP (prosedur operasyen standard) maya napi sebun asap, enti bacha IPU ngelui 200, sekula nya enda tau enda ditutup, tang pemutus nya bepanggai ba Kepala Pengajar sekula nya,” ku iya. — Bernama