Anda di sini

Pejalaika tanggungpengawa ngemansang genturung pendiau

Advertisement
 Harden (tengah) begambar enggau peranak rumah panjai Sengelau sepenembu program nya.
BEGULAI ENGGAU KOMUNITI: Harden (tengah) begambar enggau peranak rumah panjai Sengelau sepenembu program nya.

SRI AMAN: Menteri Muda Pengelantang Komuniti Sarawak, Datuk Francis Harden Hollis ngelalau tetiap iku ketuai raban ditu ngambika terus bejalaika tanggungpengawa ngemansangka genturung pendiau sereta rumah panjai sida empu.

Iya madah, ketuai raban bansa ke mangku pengawa nyadi Temenggong,Penghulu, Tuai Rumah enggau ke bukai patut ngabas rayat begulai enggau ketuai nengeri, kelimpah suah ngatur aum enggau komuniti ba kandang menua sida empu.

“Nengah aum ke diatur, nya ngemudahka semua proses perambu pemansang ke deka dikemansang ba kandang menua kita empu,” ku iya.

Harden ke mega Kaban Kunsil Nengeri (ADUN) Simanggang bejaku munyi nya lebuh bejadika ‘Program Intergenerasi Komuniti Prihatin 2019’  ke diatur Opis Pengintu Pengelantang Mensia Mayuh(JKM) Bagi Menua Sri Aman enggau Desa Bina Diri Kuching  ba Rumah Maria Lutang, Sengelau Undop, Sri Aman ditu.   

Iya madah, nengah aum bala ketuai ba tetiap rumah panjai, semua penerang bekaul enggau pemansang sereta penanggul ke ditapi tetiap rumah panjai ulih ditemu.

Ku iya agi, bala ketuai patut sejalai nengah atur polisi perintah ke alai sida patut mereti sereta nemu gaya maya dikena nentuka tetiap perambu perintah dalam sesebuah kandang menua tauka rumah panjai nya ulih bekerejasama enggau mujur.

“Kitai enggai, perambu manah perintah dalam sesebuah rumah panjai tejanggal tauka ditarit pulai, ketegal kenu ku  nadai pemendar ari peranak rumah panjai tauka rayat nyentuk ke tau ngerugika komuniti nya ba timpuh ke lama.

“Nyadi ketuai, kitai patut enda milih maya gawa dikena nentuka perambu kita mujur,” ku iya.

Berebak enggau nya, iya minta sereta ngarapka semua ketuai di nengeri tu ulih nentuka rayat terus nyukung perintah enggau ketuai ke diatu ngambika semua projek ti diperambu sereta deka dipejalaika mujur sereta manah.

Sama bisi ngulu program nya, pengari Residen Bagi Menua Sri Aman, Patricia Ngali, pengari Pemesai Pelilih Menua Sri Aman, Sandin Ajah, Prinsipal Desa Bina Diri Kuching, Tiong Kunyok, Penghulu Bailey Gamang, Sapit Chairmain Opis Pelilih Menua Sri Aman (MDSA), Kunsilor Andar Suntai, Pemesai Pengintu Pengelantang Raban Bansa Bagi Menua Sri Aman, Vivian Engkiong sereta ke bukai.

Ba program nya, Harden udah ngemendarka bantu ungkup taun 2020 sepenyampau RM5,000 ngagai JKKK sereta RM3,000 ungkup Biro Orang Indu Rumah Maria Lutang.

Program nya bisi disempulang enggau sesi licha, pekit nyura, senamrobik enggau sukaneka.

Advertisement