KUCHING: Gabungan Parti Sarawak (GPS) deka bulih pemendar ari Opis Pengerejista Gerempung (ROS) ngambika tau ngengkahka leka jaku GPS ba baruh logo gempung nya ke diatu.
Presiden Parti Rakyat Sarawak (PRS), Tan Sri James Masing madah, penambah leka jaku GPS ba logo ke diatu nya dikena nyeliahka pengundi ngambika enda saru.
“Simbol Kenyalang ti dikena kitai ba logo GPS diatu nya enda chukup laban mayuh agi logo Kenyalang ke bukai.
“Nya alai dikena mida GPS enggau Kenyalang ke bukai, kami ngaga pemutus engkah GPS di baruh nya.
“Tu beguna amat laban logo nya deka dikena maya pengawa bepilih ula engga ba keretas undi,” ku iya.
Iya madah munyi nya lebuh dikerandau pengarang berita pengudah Aum Kaunsil Ketuai Tetinggi GPS ba Indu Opis Parti Pesaka Bumiputera Bersatu (PBB) ditu kemari.
Kepala Menteri Datuk Patinggi Abang Johari Tun Openg ke mega Chairman GPS udah nyadi chairman aum nya.
GPS gempung empat parti iya nya PBB, PRS, Parti Sa’Ati Rakyat Sarawak (SUPP) enggau Parti Demokratik Progresif (PDP).
Gempung nya dilancharka kena 12 Jun 2018 pengudah Barisan Nasional (BN) alah ba Pengawa Bepilih Besai (PRU) kena bulan Mei 2018.
GPS ku Masing deka ngatur ‘retreat’ ujung taun ti dikena nyendiaka diri napi Pengawa Bepilih Nengeri (PRN) ti dipelabaka diatur ba taun2021.
Aum silik sentang ‘retreat’ nya deka diatur dalam bulan September tu sebedau diatur baka ke udah diperambu.