Anda di sini

Sarawak deka bulih pemaik ari pemindah indu menua Indonesia ke Kalimantan

Advertisement
ABDUL KARIM
ABDUL KARIM

KUCHING: Sarawak deka bulih pemaik ari pemindah indu menua Indonesia ke Kalimantan, ku Menteri Dagang Temuai, Seni, Amin Asal , Nembiak Lumba enggau Main Datuk Abdul Karim Rahman Hamzah.

“Udah tentu Sarawak deka bulih pemaik ari pemindah indu menua Indonesia laban nya deka dipindah ke pulau ti sama enggau nengeri kitai,” ku iya pengudah pengawa ngelepaska pesereta kategori penuh Kuching Marathon 2019 di Padang Merdeka,ditu, kemari.

Hari Lima, Presiden Indonesia Joko Widodo sechara rasmi ngelanggur ngagai parlimen deka mindah indu menua Jakarta ke bepalan di pulau Jawa ke Kalimantan di Pulau Borneo.

Mengeri ke dipilih agi bedau dipadah tang dipelaba sebengkah kandang menua di Pulau Borneo iya nya Kalimantan Timur, Kalimantan Barat enggau Kalimantan Selatan.

Sebedau tu Opis Menteri Perambu Pemansang Menua Indonesia ngira projek pemindah nya beungkus  $32.5 bilion lalu dipelaba tembu taun 2024.

Abdul Karim madah entara pemaik  Sarawak ari pemindah nya, nengeri tu bisi potensial mekal kuasa elekterik ke Kalimantan laban iya pechaya pemansang indu menua Indonesia nya begunaka penatai kuasa elekterik mayuh.

“Kitai bisi bekal elekterik ke mayuh , enti aum engkeman digaga enggau perintah Indonesia, kitai ulih eksport elekterik dikena ngemansangka indu menua (Indonesia) ke baru tu,” ku iya.

Ari sukut dagang temuai, iya madah mayuh agi temuai ari Indonesia dipelaba deka datai ngagai nengeri tu ti endang nyungkak pemansang dagang temuai domestik laban Kalimantan bekunsi garis entara menua enggau Sarawak.

Nya alai, pemindah Jakarta ke Kalimantan berita manah ungkup Sarawak lalu pemerat khas deka diberi maya pemansang indu menua Indonesia ke baru nya berengkah.

“Kelimpah ari nya, engka orang dagang ari Sarawak mega ulih ngambi bagi dalam pemansang indu menua Indonesia baru tu,” pia ku Abdul Karim.

Advertisement