MIRI: Nembiak sekula ke landik ba jaku bansa bukai sereta ngembuan runding ti tebuka ulih besemekih ba renggat global kelebih agi dalam jeman teknologi moden.
Menteri Muda Dagang Temuai, Seni enggau Main Asal Datuk Lee Kim Shin madah, pengelebih pengelandik sida ngena jaku bansa bukai ulih belajarka adat sereta teknologi ari menua mansang.
“Ambika chunto, enti sida landik ba jaku Jipun, sida ulih belajarka teknologi ari menua ti bejuluk menua maya matahari pansut nya enggau belajarka adat asal, pemakai enggau main asal nya,” ku iya ba Pengerami Nutup Sarawak Bon Fest 2019 di Coco Cabana Miri kemari.
Lee madah, nembiak mega bisi peluang bulih kereja ba menua maju nya enti landik enggau meretika jaku ari peranak menua nya.
“Bala nembiak diperansang ngangkatka pengelandik ba jaku bansa bukai ngambika sida ulih besemekih enggau bulih penuduk ke manah agi dalam makit kereja,” ku iya.
Pia mega ku iya, deka nyadi sebuah menua ti maju, rebak biak patut bisi penemu global sereta landik ba jaku global baka Inggeris enggau jaku bukai di dunya.
Bon Fest diatur Sekula Sekondari (SM) Sains Miri enggau tuju deka nyadika jaku Jipun nyadi jaku ketiga ba sekula nya.
Lee muji SM Sains Miri ke meri peluang ba kus ‘multi bahasa’ ngagai bala nembiak sekula sereta ngatur Bon Fest dikena ngangkatka pengandal pesereta ba belajarka jaku enggau adat orang Jipun.
Chairman pengatur pengawa, Fiona Toh madah, program dua hari nya sebengkah juluk sida deka ngangkatka penemu ukai semina ba jaku Jipun tang mega adat Jipun.
Program nya mega disukung Opis Menteri Pelajar Malaysia enggau Japan Foundation Kuala Lumpur.
Bisi mega datai program tu nya Penulung Direktor Sekula Beasrama Penuh Badrul Hisyam enggau Nur Lydyawanis, Principal SM Sains Miri Mohd Dzul Badzli Abdullah, pengari Japan Foundation Kuala Lumpur, Soto Osomo sereta. orang ke ngempu Coco Cabana Miri, Troy Yaw.