BELURU: Urung RM583 juta udah diungkupka dikena nyendiaka perengkaguna infrastruktur pemun baka kuasa elekterik, ai beresi enggau sistem jalai alun enggau projek Unit Pekara Jalai Pengarap Ke Bukai (UNIFOR) ba kandang menua Marudi sereta Beluru.
Kaban Kunsil Nengeri (ADUN) Marudi, Penguang Manggil madah, semua projek pemansang nya udah sereta benung dipejalaika berengkah taun 2016 nyentuk taun tu ngambika ulih meri pemaik enggau pengelantang ngagai peranak ba kandang menua nya dalam timpuh tiga taun ti deka datai.
“Taja pia semua projek pemansang ke udah diperambu tu semina mujur dipejalaika enti rayat terus nyukung ketuai perintah ba baruh pegai Gabungan Parti Sarawak (GPS).”
“Nya alai, rayat patut milih memanah lalu milih perintah ti endang amat mai pemansang ngagai rayat. Nadai perintah bukai ke ulih merintah nengeri tu enggau manah kelimpah perintah pegai GPS,” ku iya maya ‘Dialog Perdana Bersama Ahli Majlis, Ketua Masyarakat dan Ketua Kaum Kawasan DUN N76 Marudi’ di Dewan Komuniti Beluru, kemari.
Penguang ke mega Menteri Muda Kaunsil Kandang Menua madah, ari projek nya ke udah tembu nyengkaum ngangkatmanah Jalai Miri - Marudi, projek bekal ai beresi Beluru Fasa 2 ari Pasar Beluru ke Rh Pengabang lalu ke benung dipejalaika nya Tebing Sungai Marudi, Jalai Marudi - Mulu Fasa 1 sereta Program Grid Bekal Ai Sarawak Kandang Menua Utara ba pasar Beluru enggau Marudi.
“Sekeda agih belanja ba baruh Projek Mit Menua Pesisir (MRP), Program Transformasyen Menua Pesisir (RTP) enggau projek khas ke dibelanja perintah Sarawak tu udah dikena lalu bedau laban bisi projek baru dikemendarka.”
“Kenyau 2017 kitai udah bejalaika penyampau 88 iti projek ba baruh RTP enggau 29 iti projek dipejalaika ba taun tu enggau pekara dikemerat nyediaka bekal ai beresi sereta kuasa elekterik,” ku iya.
Ku iya, ungkup kandang menua Marudi entara kereja ngangkatmanah Jalai Miri- Marudi , pengawa ngaga enggau ngemesaika Tebing Sungai Marudi, jematan Marudi, jematan baru Sungai Arang, projek bekal elekterik di Baram Hilir, ngaga jalai Marudi - Mulu, ngangkatmanah Tua Pek Kong enggau balai mayuhguna sereta masjid, ngangkatmanah Kubu Fort Marudi, ngaga lima buah jematan baru ke ganti jematan bailey sepanjai Jalai Miri - Marudi.
Pia mega di Beluru nyengkaum ngangkatmanah, ngaga baru jalai ke genturung pendiau Beluru Fasa 1 enggau ke genturung pendiau Beluru/Tinjar/Baram Hilir Fasa 2, ngaga jalai ke rumah panjai sepanjai Jalai Beluru ke Long Lama, ngaga baru Dewan Komuniti Tinjar di Lapok, ngangkatmanah enggau ngaga gerija sereta Skim Elekterik Menua Pesisir Sarawak (RES) nyengkaum projek bekal ai beresi Beluru Fasa 2 (Pasar Beluru ke Rumah Pengabang) lalu projek bekal ai beresi Beluru enggau Tinjar Fasa 2.
Penguang madah, iya deka rayat ba kandang menua Marudi enggau Beluru nemu semua projek pemansang ke udah enggau ke deka dipejalaika dalam timpuh tiga taun ti deka datai.
“Aku deka lurus ngambika semua orang nemu tuju pejalai pemansang kelebih agi projek besai baka infrastruktur pemadu baruh nyengkaum bekal ai, elekterik kelimpah UNIFOR,” ku iya.
Sentang dialog nya, Penguang madah nya tuju deka meresa baru penerang pemansang ngagai bala ketuai raban bansa, kunsilor di Marudi enggau Beluru.
Ba pengawa nya mega Penguang nyuaka paung buah rian Musang King ngagai pengari rumah panjai ba kandang menua nya lalu bejadika Dewan Komuniti Beluru.