SIBU: Isu politik di Semenanjung (Malaya) enggau ulah enggai bepeda pangan diri enda patut dibai tama ngagai Sarawak, pia ku Presiden State Reform Party Sarawak (STAR) Lina Soo.
Iya madah, rayat pupu bansa enggau pengarap di nengeri tu udah lama begulai likun sereta beserakup.
“Diatu kitai meda mayuh isu nyadi di Malaya baka isu ‘khat’, Lynas, undang-undang nukar pengarap, Zakir Naik, video beleman, kerita terebai enggau keritai nasional ketiga.
“Enti kitai ditu nitihka chara sida lalu bela ngembuan ulah ke sebaka dia penyerakup kitai ditu deka pambar, kitai enggai kiruh enggau isu-isu baka tu ti nadai kaul enggau kitai ditu.
“Nya alai, kitai ngarapka isu Malaya enda dibai ke Sarawak,” pia ku iya maya aum media ditu, kemari.
Lina madah, ulah enggai bepeda pangan diri ti dikerembai ngagai mensia mayuh meseti diketuka sebedau pekara enda manah ke bukai nyadi.
“Nama ke diirau kitai iya nya gaya politik di Malaysia maya hari tu ti ngepunka ulah enggai bepeda pangan diri.
“Kitai di Sarawak enda ulih enggau sida baka nya, sida suah bekenaka isu bansa enggau jalai pengarap.
“Manah agi kitai ditu ngemeratka agi pemansang menua diri,” ku iya madah baru.
Tu ku iya nya nyengkaum ngemeratka pengawa ngambi hak Sarawak nitihka Sempekat Malaysia 1963 (MA63), minyak enggau gis, isu tanah adat sereta mayuh agi.
Iya madah, pemansang baka ai paip, karan, jalai alun, pelajar enggau sekula repok nyadi isu ti meseti dikemeratka agi ari pekara bukai di Sarawak.
“Menua ke diwan pupu raban bansa enggau jalai pengarap patut nangam kaul ke manah enggau pangan diri seririh enggau pengerembai ekonomi.
“Pengawa bemunsuh enggau bansa bukai, etnik tauka jalai pengarap semina mai penusah ti tau bendar nekul pemansang nengeri,” pia ku iya.
Sama bela datai maya tu iya nya Sekretari Besai STAR Simon Tiong, ex-Kaban Kunsil Nengeri Pujut Fong Pau Teck ari Sarawak Independence Alliance (SIA), John Ting ari Pergerakan Pembebasan Sarawak (SLM) enggau Thomson Ngu ari Defender Sarawak.