BINTULU: Penatai enggau raban orang indu Parti Rayat Sarawak (PRS) ke ngambi bagi ba pekit lumba main mandangka sukung sereta ulah beberatka ukai semina ba pengerai diri tang dalam ngenegapka kaul entara bala kaban parti.
Presiden PRS Tan Sri Datuk Amar Dr James Jemut Masing madah, ke datai ari jauh nunjukka nuan(bala kaban orang indu)ngemeratka pengerai diri deka terus nempa kaul entara kaban parti sereta beberatka ngagai parti.
“Tu amat begun aba aku. Iya mega mandangka bala kaban orang indu rindu ba aktiviti lumba main sereta ulih mantu dalam bejalaika kereja ke meri pemaik ngagai parti,” ku iya bejaku ba pengerami nutup enggau nyuaka perais Pekit Futsal Orang Indu PRS ‘Piala Pusingan Ketua Wanita PRS Dato Sri Doris Sophia Brodie 2019’ di Gelanggang Futsal Kelab Kidurong Bintulu lemai kemari.
Sapit Kepala Menteri ke mega Menteri Pemansang Insfrastruktur enggau Perengka Pengangkut Sarawak nya ngelalau bala kaban orang indu PRS terus nyukung ngambika ngenegapka parti nya.
Ku iya, PRS entara organisasyen ke ulih ngatur aktiviti lumba main ke bansa nya enggau mujur nengah sukung ari semua kaban iya.
Kaban Kunsil Nengeri(ADUN) Baleh nya mega muji pengeransing ti tinggi ba lumba main ke dipandangka bala orang indu PRS ti ngambi bagi ba pekit Futsal pengelama dua hari lalu udah mantaika pemain ke chukup manah sereta bebendar dalam pekit nya.
“Sida ke alah anang tusah ati laban agi bisi pekit ba taun baru ila alai kita nguji enggau naka ulih,” ku iya.
Ketuai Orang Indu PRS ke mega Sekretari Politik Kepala Menteri
Dato Sri Doris Sophia Brodie madah,pekit futsal nya ulih diatur ukai ketegal iya bisi tim orang indu(PRS) ke takluk ba belakang aku ngemujurka nya tang sukung semua dalam PRS kelebih agi ari ketuai, YB, nembiak sereta bala bukai.
“Penyereta raban nembiak dalam ngatur pekit sereta nyukung semua orang udah mai pekit ninting taun tu meri pengingat ke manah,”
Iya madah, main futsal dibantai ukai deka nempa pemayuh pemain ke manah orang indu PRS dalam lumba main tu tang mega ba penyereta tim ke niki ngagai 19 iti tim ba taunt u lalu ngarap orang ngambi bagi deka niki agi ba taun ke dudi ila.
Terang iya, pekara ke beguna orang indu PRS ulih begulai, nyungkak pengeransing ba lumba main enggau kaul entara orang indu PRS serata Sarawak.
Bisi mega ngulu pekit tu nya bini Tan Sri Dr James Masing Puan Sri Datin Amar Corrine Masing, Kaban Parlimen Hulu Rajang Datuk Wilson Ugak Kumbong,
ADUN Samalaju Majang Renggi enggau bini , ADUN Pelagus Wilson Nyabong Ijang, Sekretari Politik Kepala Menteri Edwin Banta, Beatrice Kedoh sereta exco PRS,
exco orang indu PRS, kaban kaunsil tinggi PRS enggau bala ketuai raban bansa kandang menua nya.