MUKAH: Adat asal sereta reta pesaka aki ini patut ditan ungkup rebak ke dudi ila.
Kaban Kunsil Nengeri (ADUN) Balingian Abdul Yakub Arbi madah, sesebengkah pekara bekaul adat aki ini ke dulu suba enda patut dilengka ngambika enda lenyau diserunyut pemansang dunya.
“Adat ke manah sereta engkeman enggau gaya pengidup patut ditanka kitai begulai ngambika pesaka kitai ba bala nembiak kemaya hari tu enggau dudi hari ila,” ku iya maya Pengerami Woksyop Adat Betunang enggau Kahwin Bansa Melanau Zon Batang Mukah kena lemai Hari Minggu.
Bisi mega ngulu pengerami tu nya Residen Mukah Hamdiah Bakir.
Nitihka Yakub, adat asal dikeirauka lenyau enti enda dijaga enggau dikemeran orang rebak biak.
Berindik enggau nya, pekara nya patut ditemu enggau enda tau enda dikemerat lalu begunaka kerejasama semua orang.
Kelimpah ari nya, bepelasarka ba adat asal ke bekaul enggau pengerami baka kawin, nya mega siti chara alai ngenegapka kaul sama diri sekalika diri sebilik tauka komuniti.
Woksyop bansa nya, iya ngelanggur ngambika diatur enggau suah sechara ninting taun.
Tu dikena nentuka bisi orang ngemeran nya meruan berati enggau nemu adat asal betunang enggau kawin kelebih agi bansa Melanau ngelingi Batang Mukah.