MIRI: Sepenyampau 204,000 liter ai mujur dianjung dalam pengawa ngebom air ti dipejalaika bilon Bombardier CL-415 diempu Ejensi Penerit Adat Tasik Malaysia (APMM) dikena mutarka penusah angus di Kuala Baram, kemari.
Ketuai Opis Pengerara Api enggau Penyah Penusah Malaysia Zon 6 Miri, Penguasa Kanan Bomba I Law Poh Kiong madah bisi 34 pengebom ai mujur dipejalaika dalam dua ‘sortie’.
“Seharitu (semalam) bilon Bombardier mujur ngaga dua ‘sortie’ iya nya ‘sortie’ keterubah bejalai jam 9.30 pagi lalu terengkah jam 12.30 tengahari, pia mega ‘sortie’ kedua bejalai jam 1.15 tengahari enggau terengkah jam 3.35 lemai.
“Operasyen bejalai manah enggau pemesai 11 kilometer pesegi kandang menua mujur dipejalaika ngebom ai lalu pemujur pengawa sehari nya dipelaba penyampau 40 peratus ,” ku iya ba siti penerang ditu kemari.
Law madah pengawa ke dikemerat seharitu (19 Ogos) deka diteruska enggau ngebom ai ba sektor tiga lalu deka dipejalaika dalam dua kali penerebai.
Operasyen ngerara penusah angus di Kuala Baram ke datai ba hari ke-18 kemari mungkur raban bomba ari Balai Bomba enggau Penyelamat (BBP) Lopeng di sektor satu, tim kompeni Naim di sektor dua sereta bilon Bombardier di sektor tiga.
Nitihka Law, tim BBP Lopeng mujur madamka penusah angus rumput pemesai 10 ikar di tepi jalai enggau penyauh 1.8 kilometer ari Sekula Primari (SK) Kuala Baram 2.
Berebak enggau nya, Menteri Muda Dagang Temuai, Seni enggau Main Asal ke mega Kaban Kunsil Nengeri (ADUN) Senadin Datuk Lee Kim Shin madah sepenyampau 20,000 iti ‘topeng muka’ deka dibagi ngagai sekula ke napi penusah angus seharitu (19 Ogos).
“Semua sekula ditu deka diberi kelebih agi ngagai sekula ke balat napi penusah angus sereta semak enggau palan penusah angus di Kuala Baram nya,” ku iya pandak lebuh dikerandau pengarang berita kemari.
Berbak enggau nya, stesyen alai mantau kualiti angin di Palan Pemantih Industri(ILP) Miri mandangka Indeks Pengamah Angin (IPU) ba ikas enda manah ke pengerai enggau bacha 160 naka jam 5 lemai kemari.
Pia mega ba SK Kuala Baram 2 enggau Miri agi mengkang ba jelan pemeresi ti mandangka bacha IPU 83 enggau 60.