SINGAPURA: Opis Menteri Dagang enggau Industri Singapura meda Sarawak bisi potensial ke besai lalu andal deka terus bekerejasama ngambika ngangkatka produktiviti enggau beranakka puku.
Entara siti bidang ke dipeda kededua perintah iya nya modal intelektual Sarawak.
“Kami deka ngemansangka modal intelektual Sarawak lalu kami deka ngemansangka tu nengah rayat Sarawak bekereja enggau menua bukai baka Singapura.
“Nengah ngereja pengawa begulai, kami ngaga siti pelasar enggau nyerungkai teknologi baru ke ulih ngasilka nilai ngagai penatai asal ke bisi kami,” ku Kepala Menteri Sarawak Datuk Patinggi Abang Johari Tun Openg madah ba jaku iya maya bejadika pengawa ngelancharka Forum Dagang Sarawak-Singapore enggau Ekspo 2019 ensana.
Bisi datai ngulu iya nya ex-sapit Kepala Menteri Datuk Patinggi Tan Sri Dr George Chan, Menteri Dagang Temuai ,Seni, Main Asal, Nembiak Lumba enggau Main Datuk Abdul Karim Rahman Hamzah, Sapit Kepala Menteri Datuk Amar Douglas Uggah Embas enggau Datuk Amar Awang Tengah Ali Hasan, Menteri Kaunsil Kandang Menua enggau Pengawa Berumah Datuk Dr Sim Kui Hian, sereta ke nyadi Sekretari Nengeri Datu Jaul Samion.
“Aku pechaya menua Singapura bisi mensia ke landik (guna kami) Enti penatai pengelandik orang Singapura ulih bekerejasama enggua orang Sarawak, kitai deka meri servis ngagai serata kandang menua Asean,”iya nambah.
“Kandang menua ke bukai nya daya penarit asal kitai dalam main asal enggau sektor dagang temuai. Kitai ulih ngangkatka sektor tu enggau meransang mensia mayuh berkomunikasyen,”
Abang Johari madah, sebengkah pekara ke ulih Sarawak enggau Singapura bekerejasama iya nya nengah pemaik pemansang IR4.0
“Kitai ngangkatmanah infrastruktur digital, enggau kitai diatu deka ngadu 5G. Taja kitai bedau nyapai 4G(bedau), Kitai ngena 5G terus lalu kitai bekerejasama enggau kompeni antarabansa baka Huawei ke manah ba teknologi 5G.
“Kitai mega ngangkatmanah penyambung ‘fibre optic connectivity’ dikena niki ke pengelaju data,” ku iya.
Bekunsi penemu runding, Menteri Dagang enggau Industri Singapura, Chan Chun Sing madah: “ Aset paling besai dikena kitai bekerejasama iya nya sama mai orang ke ngaul orang. Kitai nemu penyampau ke mayuh bekereja di Singapura nya orang Sarawak lalu nya beguna amat ngagai kitai,”
Iya mega ngenukuka Singapura meda bisi peluang ke besai entara Sinpura enggau Sarawak.
“Dia bisi potensi ke besai entara Sarawak enggau Singapura enggau mega mayuh kandang menua ke ulih diserungkai ba kededua nengeri nya.
“Kitai ngelaluka Sarawak ngena Singapore nyadi pelasar ,ukai semina ba dagang di Singapurea tang dikena ngerembaika dagang di luar Singapura.,” ku iya.
“Sarawak mayuh produk asal enggau penatai asal lalu ke dikerindu ke kitai.
Kelimpah ari nya, bidang bukai kedeka Singapura enggau Sarawak , ti ulih diserungkai iya nya sektor dagang temuai ke mega dia bisi peminta ke majak ngerembai tinggi ba eko-dagang temuai.
“Kitai ngarapka ulih netapka mayuh agi penerebai entara Singapura enggau kuching sereta ke bukai di Sarawak,” ku iya nambah.
“Aku pechaya dagang entara Sarawak enggau Singapura ngambika terus ngerembaika tegap. “ku iya.