KUCHING:Raban bepenatai pemisi baruh di mengeri besai tu nyengkaum ke diau ngelingi diperansang datai meresa pengerai ba Program Juh PeKa B40 ti diatur Klinik Pengerai (KK) Petra Jaya sehari tu.
Direktor Opis Pengerai Nengeri Sarawak , Dr Jamilah Hashim madahka, nengah PeKa B40 sida ke patut ti beumur 50 taun ke atas deka nerima empat penguntung tauka pemanah bekaul enggau pengerai.
Iya madahka empat penguntung ari PeKa B40 iya nya meresa pengerai, bantu kereban perubat (nyentuk RM20,000), insentif nembuka perubat riman (RM1,000) enggau insentif tambang perengka pengangkut (nyentuk RM1,000)
“Sehari tu (kemari) enggau pagila (sehari tu) ari pukul 8 pagi ngagai 5 lemai kami ngatur Program Juh PeKa B40 ba KK Petra Jaya, nya alai kami meransang raban tu (B40) di mengeri besai tu sereta ke diau ngelinggi Kuching datai beperesa pengerai, tu nadai bebayar.
“Kami nagit dalam dua hari tu program tu urung 600 iku B40 datai beperesa pengerai nengah PeKa tu.
“Tu inisiatif perintah nengah Opis Menteri Pengerai Malaysia (KKM) dikena mantu raban bepenatai pemisi baruh (B40), ke alai perintah ngungkupka belanja sepenyampau RM100 juta ungkup urung 800,000 iku B40 serata Malaysia,” ku iya.
Dr. Jamilah mansutka pekara nya lebuh iya bejaku seraya bejadika program PeKa B40 ba KK Petra Jaya lalu ti keterubah iya dipenyadi ba nengeri tu, kemari.
Skim PeKa B40 iya nya inisiatif perintah nengah Opis Menteri Pengerai ti enggau tuju dikena nyaup peminta guna meresa pengerai raban bepenatai pemisi baruh, ti mekuh tauka fokus ngagai penyakit enda berampit (NCD).
PeKa B40 diungkup ngagai rayat Malaysia ti bepenatai pemisi ruang bilik 40 peratus pemadu baruh, ti dikumbai nyadi raban B40.
Penerima Bantuan Sarawak hidp (BSH) enggau tawaing, ti beumur 50 taun ke atas, ti enggau automatik ulih nyereta PeKa B40. Nadai pengerejista khas dikena nyereta PeKa B40.
“Dikena nentuka ulih nerima bantu kereban pengerai (nyentuk RM20,000), insentif nembuka perubat riman (RM1,000) enggau insentif tambang perengka pengangkut iya nya Sarawak enggau Sabah diungkupka RM1,000, ti dipejalika nengah program tu, penerima PeKa B40 enda tau enda nembuka beperesa pengerai dulu,” ku iya.
Kelimpah ari ba klinik pengerai KKM, beperesa pengerai PeKa B40 mega ulih dipejalaika ba klinik perubat peribit tauka klinik bebayar ti berejista.
Rintai penuh nama klinik PeKa B40 tau dip[eda ba www.pekab40.com.my.
“Raban B40 mega ulih meresa pengerai PeKa B40 ba klinik bebayar ke bisi kelai PeKa.
“Anang irau sereta takut laban skim PeKa B40 klinik bebayar tauka klinik luar mega nadai bebayar,” ku iya.
Dulu ari nya lebuh ti ngenang pasal penyakit enda berampit (NCD) bepelasarka pansik KKM ku Dr. Jamilah, ambika chunto sakit kemi manis tebal agi raban B40, nyema bisi 100 iku B40 lali ari penyampau nya 22 iku B40 bisi kena penyakit nya.
Pia mega darah tinggi, ba raban B40 bisi 30 iku ari 100 iku B40 bisi darah tinggi dibandingka enggau 16 iku ukai raban B40, ku iya.
“Baka penyakit riman, kitai ninga mayuh orang sarawak betapi enggau penyakit tu, laun ditemu laban laun berubat tauka beperesa, lebuh udah ditemu rimah bisi nya udah datai ba renggat 3 tauka 4 enggau ke bukai.
“Berindik ari pekara ti disebut nya tadi, dia KKM numbuhka program PeKa B40 tu,” ku iya.
Sama bisi datai ba pengerami nya kemari, Pegawai Pengerai Bagi Menua Kuching Dr Azlee Ayub, Penyanding Penemu ProtectHealth Zainurin Julaihi enggau Sapit Chairman Gerempung Pengintu Pengelatang Pendiau Petra Jaya Prof Madya Datuk Dr. Munirah Hassan enggau ke bukai.