KUCHING: Opis Bekal Ai Menua Pesisir (JBALB) Sarawak udah nemu sentang gaya musim angat enggau kemarau di nengeri tu dipelaba terus nyadi nyentuk bulan Oktober tu ila.
Jurujaku JBALB Sarawak ba siti penerang madah, gaya hari tu agi baka biasa, likun enggau bekal ai chukup dikena sereta ke ungkup ngagai mensia mayuh di serata nengeri Sarawak.
“Tang, opis JBALB Sarawak udah tetemuka kandang menua ke bisi napi penanggul ketegal musim kemarau tu.
“Kandang menua nya baka Sri Aman, Teluk Melano, Pantu, Selangau, Penibong, Kuala Balingian enggau Suai,” pia ku JBALB Sarawak.
Ku iya agi, lebuh ke napi musim kemarau tu, JBALB Sarawak udah besedia enggau merambu pelin bejalaika kontingensi unkup musim kemarau tauka disebut ‘Contingency Response Plan for Drought Season’.
Pelin nya,terang iya, numbuhka ‘Bilik Gerakan JBALB’ (operasyen) ba Indu Opis enggau JBALB Bagi Menua Sri Aman ke udah beoperasyen kena 16 Ogos tu tadi.
Pia mega,nitih ku penerang jurujaku JBALB Sarawak madah, ‘Bilik Gerakan JBALB’ (operasyen) di Indu Opis bejalaika pengawa tetiap hari berengkah pukul 8 pagi nyentuk 10 malam (Hari Satu ngagai Hari Lima) lalu ari pukul 8 pagi ngagai 8 malam (Hari Enam enggau Hari Minggu).
“Pengawa nganjung ai ngena ‘tanker’ sereta JBALB Sarawak deka nyemetak madah kami amat komited ba pekara nentuka semua penanggul bekal ai ke bisi ketegal ari musim kemarau tu kelebih agi ngagai sida ke diau ba kandang endur tinggi deka diputarka enggau lengkas.
“Pengawa nganjung ai ngena ‘tanker’ deka dipejalaika opis kami ngambika mensia mayuh deka terus nerima bekal ai.
“Nya alai, kami deka ngelalau ngagai mensia mayuh ngambika bejejimat ngena ai maya musim kemarau tu,” ku iya nyemetak.
Berebak enggau nya, nyema bisi penanggul bekal ai, ripot ari mensia mayuh amat dikelaluka enggau betanya ba lumur JBALB Indu Opis ba 082-263000 (maya jam opis aja) lalu Bilik Operasyen JBALB 082-263078 (Sepanjai musim kemarau).
Kelimpah ari nya, tetiap berita ke diatu sentang ba gaya hari deka dipadah enggau dipasuk ba laman web rasmi Opis enggau laman rasmi FB JBALB Sarawak.