MIRI: Indeks Pengamah Angin (IPU) ke majak tinggi ba keketiga stesyen alai mantau angin di Miri kemari nya ketegal asap ke agi bisi ba sektor 1 enggau tiga penusah angus di Kuala Baram.
Ketuai Opis Pengerara Api enggau Penyah Penusah Malaysia (JBPM) Zon 6 Miri, Penguasa Kanan Bomba I Law Poh Kiong madah, bacha IPU ke niki mega ketegal ari tiup angin.
“Bacha IPU ba keketiga stesyen agi sama taja gaya kandang menua ngelingi tiga stesyen nya jauh terang ari kemari.
“Pemantau meda sektor 1 bisi dua endur ke agi aktif ngeluarka asap ke semak enggau Kompleks Pengintu Pengelantang Hamidah lalu siti damping rumah burung ke enda jauh ari palan semak kompeni Naim,” ku iya ba siti penerang ditu kemari.
Bacha IPU di Palan Pemantih Industri (ILP) Miri mandangka niki enggau jampat kenyau pukul 9 malam ensana enggau bacha naka pukul 5 lemai kemari ngerikodka 222 lalu ba kategori pemadu enda manah ke pengerai.
Pia mega Sekula Sekondari (SK) Kuala Baram 2 ngerikodka ba kategori enda manah ke pengerai enggau bacha 119 sereta Miri ba ikas jelan pemeresi enggau bacha 72.
Bacha IPU entara 0 ngagai 50 dikategori beresi, 51 ngagai 100 (jelan pemeresi), 101 ngagai 200 (enda manah ke pengerai), 201 ngagai 300 (pemadu enda manah ke pengerai) sereta 300 ke atas (enda likun).