KUCHING: Raban bepenatai pemisi baruh di mengeri besai tu nyengkaum ke diau ngelinggi diperansang datai meresa pengerai ba Program Juh PeKa B40 ti diatur di Klinik Pengerai (KK) Petra Jaya sehari tu enggau pagila.
Direktor Opis Pengerai Nengeri Sarawak, Dr Jamilah Hashim madahka, nengah PeKa B40 sida ke patut ti beumur 50 taun ke atas deka nerima empat penguntung bekaul enggau pengerai.
Iya madahka empat penguntung ari PeKa B40 iya nya meresa pengerai, bantu kereban perubat (nyentuk RM20,000), insentif nembuka perubat riman (RM1,000) enggau insentif tambang perengka pengangkut (nyentuk RM1,000)
"Sehari tu enggau pagila ari pukul 8 pagi ngagai 5 lemai kami bisi ngatur Program Juh PeKa B40 ba KK Petra Jaya, nya alai kami meransang raban tu (B40) di mengeri besai tu sereta ke diau ngelinggi Kuching datai beperesa pengerai, tu nadai bebayar.
"Tu inisiatif perintah nengah Opis Menteri Pengerai Malaysia (KKM) dikena mantu raban bepenatai pemisi baruh (B40), ke alai perintah ngungkupka belanja sepenyampau RM100 juta ungkup urung 800,000 iku B40 serata Malaysia," ku iya lebuh bejaku seraya bejadika program PeKa B40 ti keterubah diatur ba nengeri tu, ti diatur ba KK Petra Jaya ditu, sehari tu.
Skim PeKa B40 iya nya inisiatif perintah nengah KKM ti enggau tuju dikena nyaup peminta guna raban bepenatai pemisi baruh beperesa pengerai, ti mekuh tauka fokus ngagai penyakit enda berampit (NCD).
PeKa B40 diungkup ngagai rayat Malaysia ti bepenatai pemisi ruang bilik 40 peratus pemadu baruh, ti dikumbai nyadi raban B40.
Penerima Bantuan Sarawak Hidup (BSH) enggau tawing, ti beumur 50 taun ke atas, ti enggau automatik ulih nyereta PeKa B40. Nadai pengerejista khas dikena nyereta PeKa B40.
"Dikena nentuka ulih nerima bantu kereban pengerai (nyentuk RM20,000), insentif nembuka perubat riman (RM1,000) enggau insentif tambang perengka pengangkut iya nya Sarawak enggau Sabah diungkupka RM1,000, ti dipejalika nengah program tu, penerima PeKa B40 enda tau enda nembuka beperesa pengerai dulu," ku iya.
Kelimpah ari ba klinik pengerai KKM, beperesa pengerai PeKa B40 mega ulih dipejalaika ba klinik perubat peribit tauka klinik bebayar ti berejista.
Rintai penuh nama klinik PeKa B40 tau dipeda ba www.pekab40.com.my.
"Raban B40 mega ulih meresa pengerai PeKa B40 ba klinik bebayar ke bisi kelai PeKa.
"Anang irau sereta takut laban skim PeKa B40 ba klinik bebayar tauka klinik luar mega nadai bebayar," ku iya.