TANJUNG MANIS: Ketuai enggau perintah Sarawak deka terus bejalaika pengawa mantu rayat di kandang menua pesisir mutarka penanggul ti ditapi sida, taja nya begunaka timpuh ke lama.
Menteri Muda Perambu Mengeri, Pengatur Tanah enggau Rampa Menua Datu Len Talif Salleh madahka diatu pekara ti dikemerat iya nya pengawa dalam ngenegap sereta mutarka pekara ti bekaul enggau perengkaguna pemun baka bekal ai, elekterik, jalai alun, rentayan komunikasyen sereta mega isu bekaul sekula repuk.
“Mayuh inisiatif sereta chara udah digaga perintah Sarawak dalam nyendiaka pemansang ngagai komuniti ti endang randaka perengkaguna nya. Nya alai, tuduh sekeda raban ti madahka ketuai di nengeri tu enda ibuhka penanggul ti ditapi rayat kelebih agi di kandang menua pesisir dalam nengeri tu endang enda ulih diterima lalu nya semina main politik sida aja.
“Ambika chunto, isu bekaul enggau bekal ai beresi di kandang menua Belawai, ketuai sereta perintah Sarawak udah nguna mayuh inisiatif dalam mutarka pekara tu sereta pengawa ti pemadu baru iya nya ngena ai ari Batang Rajang ti diberi ari Sibu dikena nampung guna peranak di kandang menua nya.
“Chara tu dikena berindik ari pun penatai ai ti diberi ari kandang menua Bayong enda umbas lalu salur paip suah rusak sereta enda ulih nampung guna peranak di kandang menua Tanjung Manis, Belawai enggau Kuala Rajang ti majak nambah,” ku Len.
Iya madah munyi nya ba pengerami bejadi ‘Safari Nginti Tanjung Manis 2019 Renggat Ke 16’, ti udah diatur ba Terminal Bot Ekpres Tanjung Manis, kemari.
Bisi 80 iku penyereta ti deka ngerebut gelar champion dalam ‘Cabaran Memencing Tanjung Manis 2019’ ke nyendiaka perais sepenyampau RM35,500.
Pekit nginti tu iya nya dibagi ngagai dua kategori iya nya tasik dalam enggau tebing pantai, endang nyadi program ninting taun dalam aktiviti Opis Pemansang Kayu Sarawak (PUSAKA).
Program tu ti diatur dikena ngelakuka kandang menua Tanjung Manis ngagai mensia mayuh ngambika nemu pemansang ti pemadu baru ke dipejalai di kandang menua nya lalu mega nyadi siti palan dikena bejalaika aktiviti nginti ti pemadu nyulut sereta pengeraja asil tasik enggau sungai.
Beserimbai enggau pengerami nya, Len mega muji pengawa PUSAKA ke udah mayuh mai ubah sereta pemansang di kandang menua Tanjung Manis.
“Kenyau ari suba, PUSAKA udah megai tanggungpengawa sereta ejensi pemun ba pemansang di kandang menua Tanjung Manis tu. Beserimbai enggau nya, kitai deka meri besai pengaga ati ba komitmen PUSAKA dalam pekara tu.
“Nengah mayuh pelin pemansang timpuh pandak enggau panjai sida, sereta pengeransing mai penanam puku ari luar kandang menua tu, PUSAKA udah nyadi sebuah ejensi ti mantu komuniti ditu dalam ngangkatka penatai pemisi sida.
“Nyema kitai meda saritu, mayuh ubah udah nyadi di kandang menua tu, pia mega ngangkatka tikas pengidup rayat ngagai ikas ke manah,” ku Len nyemetak.
Ba pengerami nya, Len ti mega Kaban Kunsil Nengeri (ADUN) N.41 Kuala Rajang sama ngelalau komuniti di kandang menua tu ngambika ngena memanah tetiap program enggau aktiviti ti diatur di kandang menua tu ti nyadi siti peluang ke pemadu manah dikena ngangkat sereta nambah penatai pemisi sida.
Ku iya, peluang bansa tu ulih dikena enggau memanah dalam bejalaika aktiviti dagang sereta nyadi siti chara ti beguna dalam ngelakuka produk di kandang menua tu.
“Nyadi sebuah kandang menua ti bisi pengeraja enggau asil tasik sereta sungai, pia mega produk betanam betupi, komuniti patut meda enggau ngatur program bansa tu nyadi pelasar ti pemadu manah dikena ngelakuka produk sida,” ku Len nyemtak.
Sama bisi datai ba pengerami nya Pemesai Pelilih Tanjung Manis Udin Bujang enggau Penulung Menijer Besai PUSAKA Kandang Menua Tengah Johari Zainudin.