KUCHING: Penyampau kes denggi di Sarawak ari Januari nyentukka 12 Ogos taun tu bisi niki enggau penyampau 270 peratus dibanding timpuh ke sama ba taun nyin kemari.
Direktor Opis Pengerai Nengeri (JKN) Sarawak Dr Jamilah Hashim madah, sepenyampau 1,258 kes dirikodka di serata Sarawak ba timpuh nya dibandingka 340 iti kes dalam timpuh ke sama ba taun 2018.
Ku iya, Kuching ngerikodka penyampau kes sakit denggi pemadu tinggi iya nya 485 iti kes ditangkanka Miri (169 kes), Betong (125 kes), Sibu (119 kes), Samarahan (101 kes), Kapit (59 kes), Serian (57 kes), Sarikei (44 kes), Bintulu (41 kes), Sri Aman (23 kes), Limbang (21 kes) enggau Mukah (14 kes).
“Berebak enggau nya, kitai (JKN) Sarawak deka neda ngagai kes sakit denggi di Taman Tunku Miri ke bisi 49 iti kes udah dirikodka ungkup timpuh Januari ngagai 12 Ogos 2019 dibanding nadai kes ba timpuh ke sama kena 2018.”
“Bisi empat bengkah kandang menua ke ditemu kena denggi ba taun 2019 baka di Taman Tunku enggau Taman Jelita iya nya empat kes di Jalai Kuching Timur 3 maya Hari Minggu Epid (ME) ke-21 nyentuk ke-24; 30 iti kes di Jalan Kuching Timur 3 maya ME ke-30 nyentuk ke diatu (ME ke-33); empat kes di Jalai Kuching Timur 1 maya ME ke-31 nyentuk ke diatu (ME ke-33) lalu tiga kes di Jalai Perisai, Taman Jelita maya ME ke-33 nyentuk diatu (ME ke-33),” ku iya ba pengarang berita kemari.
Nitih ku iya, semua kes ti diripot udah bejalaika aktiviti matau enggau nagang ti komprehensif iya nya baka pengawa ngemunaska tempat nyamuk betelu (PTP), munuh engketung (Larviciding), manchit asap munuh nyamuk (Fogging), lalau meresika palan ti ulih endur nyamuk betelu, neritka adat meri ukum denggi sereta aktiviti pelajar pengerai.
Pia mega ku iya, aum Komiti Igi Penyakit Denggi Pelilih enggau mayuh ejensi kelebih agi Opis Kaunsil Mengeri Miri bekaul igi penyakit denggi di Taman Tunku mega bisi dipejalai.
Aum tu udah digaga dua kali iya nya 2 enggau 9 Ogos 2019, pia mega bisi bejalaika aktiviti beripai ti diatur di kandang menua ti bisi igi penyakit denggi kena 3 enggau 10 Ogos 2019,” ku iya nerang.
Berebak enggau nya, iya ngelalau mensia mayuh ngambika bejaga dikena nyeliahka diri ari penyakit denggi.
“Entara nya ngaga pansik enggau pemeresi ba kandang rumah diri empu kelimpah nentuka nadai barang ke nimbun ai ti ngujungka palan nya ke alai nyamuk eades besarang, guna ‘aerosol’ tauka ubat nyamuk dikena munuh nyamuk ke tuai dlam kandang rumah enggau ke bukai,” ku iya.
Dr Jamilah mega ngelalau mensia mayuh ngambika ngena jalai bejejaga nyeliahka sakit denggi nitihka pelasar ke udah digaga Opis Menteri Pengerai Malaysia enggau meda ba laman web www.myhealth.gov.my tauka www.infosihat.gov.my.
“Dikearapka peranak ba bagi menua Miri kelebih agi di Taman Tunku besaup bejalaika tanggungpengawa nyeliahka penusah penyakit denggi enggau chara semampai nyaga kandang rampa rumah kediri empu ngambika beresi lalu nadai barang ke ulih nimbun ai sereta bisi potensi nyadi palan nyamuk aedes besarang.
“Mensia mayuh dilalau ngambika lengkas berubat nyema bisi ngasai tanda sakit denggi baka angat, sakit pala, sakit patung, raing, muntah tauka tanda keterubah baka muntah enggau terus, sakit perut tauka lemi tulang,” ku iya.