KUCHING: Kaban Parlimen (MP) Santubong Datuk Seri Wan Junaidi Tuanku Jaafar setuju sereta nyukung perintah Sarawak ti enda ngemendarka orang ti mai politik raban bansa tama ke nengeri tu.
Wan Junaidi madahka laban orang ke mai politik raban bansa nya ulih ngeruga penyerakup pupu bansa ba nengeri tu.
Awakka aja penanggul di Semenanjung nyadi din aja sereta anang mai penanggul nya ke Sarawak, ku iya seraya madahka diri enda setuju ‘pendakwah’ tebilang Dr Zakir Naik dibai ke Sarawak.
“Aku nerima penerang ti madahka perintah nengeri Sarawak sereta aku nyukung anang mai orang baka Dr Zakir Naik tama ke Sarawak. Aku nyukung seratus peratus.
“Kitai ukai nganu sesapa, kitai enggai ke penyakup Sarawak ti nyadi model penyerakup ba menua tu tekeruga ketegal politik, lalu politik ti mambarka raban bansa di Sarawak,” ku iya lebuh dikerandau Utusan Borneo.
Dulu ari nya iya madahka politik raban bansa sereta jalai pengarap enda tau dibantaika lebih agi ba nengeri tu laban Sarawak bisi penyelai ti manah.
Sarawak ke bisi 43 raban etnik enggau sub etnik ulih idup dalam pemaik enggau penyerakup kelimpah ari ulih diau begulai taja pan enda sama bansa.
Wan Junaidi bechunto ke ba iya empu madahka diri jadi enggau bansa Cina sereta bala ipar, anak menyadi bebansa Cina, nya alai isu bekaul enggau raban bansa enda tau dibantaika.
“ba Sarawak tu 35 peratus ruang bilik iya nya bechampur (bansa enggau jalai pengarap). Nya alai enggau gaya pengidup ti baka tu kitai enggaika (penanggul raban bansa),” ku iya.
Dr Zakir dalam licha di Kelantan apin lama dipadahka udah mandingka raban bansa Hindu di Malaysia ti dipadahka lebuh mayuh pengelebih dibandingka enggau raban bansa Islam di India.
Pengelicha nya mega madahka orang Hindu di Malaysia lebih talukka Menteri Besai India, Narendra Modi dibandingka enggau Menteri Besai Malaysia, Tun Dr Mahathir Mohamad.
Taja pia diatu polis udah muka keretas pansik ngagai pendakwah nya ari baruh Seksyen 504 Kanun Keseksaan laban ti ngeluarka penerang ke ulih ngeruga pemaik enggau pengalantang.