KUCHING: Indu Opis Serakup Dayak Iban Sarawak (SADIA) mujur ngatur Program Begulai enggau Opis Bomba enggau Penyelamat Zon 1 Kuching ba Genturung Pendiau Setinggan di Cawan Gena, lurung Chawan 13 ditu.
Chairman SADIA Kuching, Dato Paduka Dr Anthony Nait madahka program nya diatur Indu Opis SADIA ti betuaika presiden iya Sidi Munan.
“Tuju kami ngatur program begulai tu ngambika tau meri penemu ngagai bala kitai Iban ke diau ba genturung tu,” ku iya madah ngagai Utusan Borneo.
Nitihku iya program segulai nya diatur kena 11 Ogos tu tadi ti dipasuk urung 100 iku peranak ba genturung pendiau nya.
Nambahka nya Sidi madahka program nya diatur dikena meri penyedar ngambika ngemeratka pengelikun berindik ari gaya hari diatu ti angat sereta rangkai.
Iya ngarapka nengah penerang , penau enggau chara madamka api ngena kereban pemadam api ke dipelajar ari raban bomba ulih mantu peranak napi nya nyema bisi penusah angus nyadi.
“Maya hari angat baka ke diatu, barang utai ulih nyadi kelebih agi api ti tau nganguska rumah.
“Nya alai sebedau utai jai nyadi, manah agi kitai bejaga ari tumu,” ku iya.
Berebak enggau program tu Indu Opis SADIA bisi melanja enam iti perengka pemadam api tauka Fire Extinguisher ti mega siti ari Tanggungpengawa Sosial Korporat (CSR) indu opis nya dikena mantu kitai Iban.
Bisi tiga iku pemesai bomba ti diketuaika Chaplin, Hillary enggau Abang Nor Azman bisi ngajar bekunsi penemu sentang chara madamka api ngena perengka pengerara api sebedau api nyerarai ngagai endur bukai.
Sama datai ba program nya Sekretari Indu Opis SADIA Mujah enggau enam iku kaban Skuad Bomba ti ditumbuhka genturung pendiau nya.