KUCHING: Ekosistem Kondusif Sektor Awam (EKSA) udah dipenyadi sereta taun tu deka dipejalaika ba semua indu opis, opis zon enggau balai bomba enggau penyelamat di serata Sarawak.
Direktor JBPM Sarawak, Khirudin Drahman madah ke diatu EKSA semina udah dipejalaika ba renggat Opis JPBM di Miri.
“Pagi tu (kemari) kitai deka bejadika EKSA renggat JBPM Sarawak, lalu baka ti ditemu kitai EKSA udah dipejalaika ba peringkat Opis JBPM Zon 6 (Miri).
“Tang taun tu deka dipejalaika ti mungkur semua indu opis, opis zon enggau balai bomba enggau penyelamat di serata nengeri.
“Tuju iya dikena nempa kandang endur ti kondusif, ngangkatka imej korporat, ngenyakahka agi aktiviti kreatif enggau inovasyen, merangsang aktiviti ti nuju ngagai pengawa numbuhka kandang endur gadung nengah ngemeranka chara gadung enggau elemen audit nitihka 5 bengkah pengawa enggau premis ejensi perintah,” ku iya.
Khirudin mansutka pekara nya lebuh bejaku nyerumba bejadika Konvensyen Kumpulan Inovasi dan Kreatif (KIK) JPBM Sarawak ti diatur ba Pustaka Negeri ditu, kemari.
Lebuh ti ngenang pasal konvensyen KIK, Khirudin bepenemu KIK nya patut nyadi mekanisme ti mungkur pengawa mutarka penanggul tauka ngemanahka agi proses kereja ke udah bisi tauka nempa pekara ti baru.
Ku iya, nya chara dikena nentuka inovasyen ti diasilka ungkup timpuh panjai.
Iya madahka pengawa ngemeranka inovasyen enggau kreativiti patut dikemeratka enggau lengkas sereta mungkur semua nengah chara meri penemu tauka runding baru ke pengelantang rayat.
Laban ku iya, empas enggau bantu KIK ngagai penumbuh enggau penegap ekonomi menua, pemansang sosial sereta pengelantang pendiau rayat deka lebih efektif sereta ulih nguntungka semua.
“Pengawa ngatur Konvensyen KIK enda patut dipeda nyadi siti acara tiap taun aja ti semina dipasuk pesereta konvensyen.
“KIK patut iya ulih nyadi siti mekanisma ti mungkur pengawa mutarka penanggul, tauka nambahka pemanah proses kereja enggau standard ti udah bisi tauka nempa pekara ti baru.
“KIK mega ngemeranka konsep knowledge-based enggau creativity driven ngambika organisyen ulih ngasilka inovasyen ti meri rega tambah ngagai produk tauka servis,” ku iya.
Bekaul enggau konvensyen peringkat JBPM Negeri Sarawak taun tu bisi tujuh tim iya nya Balai Bomba enggau Penyelamat (BBP) Bau, BBP Siburan, BBP Simunjan, BBP Sungai Merah, BBP Kanowit, BBP Miri enggau BBP Lawas udah ngambi bagi.
Pemenang deka ngarika Konvensyen KIK Renggat Nasional ti diatur kena 12 ngagai 16 November 2019 ba Wilayah Persekutuan Kuala Lumpur.
Pemenang Konvensyen KIK, lumur satu iya nya BBP Simunjan ti ngena nama tim Charlie enggau nama projek Netting Head, lalu ditangkan tim Diamond ari BBP Miri enggau nama projek Smart Injector enggau lumur tiga iya nya BBP Siburan enggau nama tim iya nya Squad 19 sereta nama projek Oil Buster.
Sama bisi datai ba pengerami nya kemari Penolong Pengarah Operasi JBPM Sarawak Tiong Ling Hii enggau ke bukai.