Anda di sini

Terima kasih Perintah Sarawak ketegal mantu sida Koperal David Edmund Rapi sebilik

Advertisement
 Fatimah dalam aum pen garang berita nerangka bantu perintah nengeri ngagai bala sebilik enggau Koperal David, seraya disempulang (ari kiba) Zayadi, Chai sereta (ari kanan) Teresa enggau Edmund enggau (belakang, ari kanan) Nur Lina enggau Morni, kemari.
AUM PENGARANG BERITA: Fatimah dalam aum pen garang berita nerangka bantu perintah nengeri ngagai bala sebilik enggau Koperal David, seraya disempulang (ari kiba) Zayadi, Chai sereta (ari kanan) Teresa enggau Edmund enggau (belakang, ari kanan) Nur Lina enggau Morni, kemari.

KUCHING: Perintah Sarawak mantu nambangka penerebai bilun pulai mansang sida Koperal David Edmund Rapi sebilik ke Alor Setar, Kedah.

Menteri Pengintu Pengelantang Pendiau,Pengelantang Raban Bansa, Orang Indu, Ruang Bilik enggau Pemansang Nembiak Mit Dato Sri Fatimah Abdullah madah, nya bantu ari Perintah Sarawak ngambika bala sebilik enggau Koperal David ulih ngambi barang sereta nentuka pasal pemansang operasyen ngiga enggau nyelamat (SAR) ti dipejalaika.

Fatimah ngarika sida Koperal David sebilik meri terima kasih ngagai Perintah Sarawak, Kepala Menteri Datuk Patinggi Abang Johari, pemangku Sekretari Perintah Nengeri Datu Jaul Samion,Ex-Panglima Medan Timur Soldadu Darat Leftenan Jeneral (B) Datuk Stephen Mundaw mantu bejakuka pekara nya enggau Opis Menteri Ngetanka Menua Malaysia sereta Direktor Unit Pengelikun enggau Penerit Adat Nengeri, Datuk Dr Chai Khin Chung, laban ti udah mantu sereta nentuka pejalai nya bejalai lanchar.

“Keterubah aku ngarika ruang bilik tu (Koperal David) meri besai terima kasih ngagai YAB Kepala Menteri (Datuk Patinggi Abang Johari Tun Openg), laban lebuh aku madahka pekara tu ngagai iya (Abang Johari), iya terus setuju meri bantu ngagai ruang bilik ngambika ulih ke Alor Setar, Kedah.

“Ari sukut penerebai enggau perengka pengangkut darat ditanggung perintah nengeri magang, lalu ba kem sida deka dienahka Kem Enjutan, semua tu udah diatur sereta semua sida (lima) udah diasuh diau ba rumah kem soldadu.

“Morni Edmund Rapi (menyadi lelaki Koperal David) ngarika sida sebilik madah ngagai aku, sida deka ke Semenanjung kin enggau batang tuju deka mai pulai barang Koperal David,” ku iya.

Fatimah m adah munyi nya ba aum pengarang berita sentang bantu perintah nengeri Sarawak ngagai ruang bilik raban soldadu ti lenyau ba Pulau Perak ti diatur ba Bilik Media, Terminal VIP, Padang Bilun Antarabansa Kuching ditu, kemari.

Kemari, empat iku Koperal David Rapi sebilik,39, iya nya Edmund Rapi Idal (apai), Teresa Hamline Neh (indai), Morni Edmund Rapi (menyadi tuai lelaki) enggau Nur Lina Aisyah Edmund Rapi (menyadi biak indu) bekejang ke Kuala Lumpur sereta terus ke Alor Setar lalu deka pulai baru 17 Ogos tu, ti diatur Unit Pengelikun enggau Penerit Adat Nengeri (UKPN) ti betuaika Direktor nya, Datuk Dr Chai Khin Chung.

Sida empat nya disempulan pemesai pengelikun ari UKPN, Zayadi Sebeli.

Ba aum pengarang berita nya, Fatimah ngarapka pengawa ngiga enggau nyelamat (SAR) kededua soldadu iya nya Koperal David ti asal ari Kampung Baru Cina, Dalat enggau Lans Koperal Moses Logers 25 taun asal ari Kampung Senibong, Bau ti diripot lenyau maya gawa ba kandang endur Operasyen Pejarak di Pulau Perak, Kedah kenyau ari 19 Julai taun tu tadi, majak dipejalaika.

Seduai iya ditemu lenyau maya ketuai palan meresa baris sereta ngitung penyampau tubuh raban nya.

“Ngarapka maya Koperal David  sebilik datai sereta betemu enggau orang ke patut ba kem nya sehari tu (kemari) enggau pagila (sehari tu), aku ngarapka sida sebilik nya dipadah pekara ti amat, pemadu beguna penerang ke pemadu baru laban sida sebilik endang patut nerima penerang pemadu baru pasal SAR.

“Apai indai kededua soldadu chukup ngarapka penyakah ngiga enggau nyelamat dikena nentuka seduai nya ditemu, nya pekara dikearapka sida sebilik.

“Baka ke didinga, apai indai enggau menyadi soldadu deka nemu ikas pemujur ngiga enggau nyelamat ari ejensi ti bakaul, ambis nadai madahka nama ke benung nyadi.

“Aku enggau semua kitai ngarapka semua atur ke udah diperambu bejalai lanchar lalu kitai besampi ngambika pengawa ngiga nya mujur, nya ke dikearapka sida sebilik enggau perintah nengeri,” ku Fatimah.

Nitihku Fatimah sida ke sebilik enggau Lans Koperal Moses lebuh ditanya sekalika deka enggau raban nya ke Alor Setar, Kedah, ku iya , sida madahka diri enda laban udah kin sereta ngena belanja diri empu.

Berebak enggau tu dalam aum pengarang berita ke sama, Edmund Rapi lebuh ti ngenang pasal berita pengelenyau Koperal David, iya madahka enda nyangka pekara nya nyadi ba anak iya.

Edmund nemu berita nya ari siku koperal lalu iya empu nentuka pengamat pekara nya ba siku mejar di Semenanjung.

“Aku suah nanya ngagai mejar nya sekalika patut tauka enda kami kin tang mejar madah enda ibuh, nganti udah temu baru madah.

“Pun bulan Ogos kami bisi betemu enggau pemesai ba Kem Batu 14 minta tulung ngambika nganjung kami terus kin (Semenanjung)tang enda ulih, ambis nadai ke Kuching laban kami nemu sida bisi aset.

“Kami lama nganti berita, pengujungka aku bisi tebacha mesej siku leftenan enggau anak aku Morni ti madah enti deka ke Perlis ngena bajet diri empu.

“Lebuh aku nerima pemutus baka, aku terus betemu enggau YB Dato Sri Fatimah ke bisi di Dalat, aku nulis surat sereta betemu mua enggau YB minta tulung nambangka kami kin (Semenanjung),” ku iya seraya madah sida nadai nerima mayuh pasal berita pengelenyau anak iya.

Fatimah ti mega Kaban Kunsil Nengeri Dalat meri bantu nengah Palan Servis ADUN Dalat ngagai Edmund sebilik.

Advertisement