Dikarang Rengenyan Labang
KUCHING: Opis Bomba enggau Penyelamat Malaysia (JBPM) Sarawak ngarapka api ti nganguska tanah kerapa lebih agi di Miri ulih dipadamka magang sebedau sesi belajar enggau ngajar berengkah minggu baru.
Direktor JBPM Sarawak, Khirudin Drahman ngarapka operasyen madamka api ba tanah kerapa di Kuala Baram, Miri ngena chara 'water bombing' ngena bilun Bombardier ti dipejalaika Ejensi Penerit Adat Maritim Malaysia (APMM) ulih mujur.
"Bombardier sehari tu dipejalaika di Miri. Aku amat ngarap sereta kitai besampi ngambika api (ba Kuala Baram, Miri) nya ulih dipadamka laban minggu baru Hari Satu sesi besekula deka berengkah.
"Laban ba kandang ILP bisi beberapa sekula enggau beberapa sekula di Kuala Baram, (nyema api majak nyadi) tu deka meri penanggul ngagai sekula, enti enda kemisi sida dilanjarka ungkup sekula ti bekaul," ku iya lebuh dikerandau pengudah bejadika Konvensyen Kumpulan Kreatif dan Inovatif JBPM Negeri Sarawak ba Pustaka Negeri, sehari tu.
Berebak enggau tu lebuh ditanya penyukup aset enggau raban dikena betapi enggau penyadi api ketegal orang ti betunu baka chara tebuka, Khirudin madah ke diatu chukup sereta kemisi raban bomba mega enda dibekuka.
Nitihku iya timpuh syif raban ke gawa ditambah ari 12 jam ngagai 24 jam dikena nentuka penyampau raban nya chukup.
"Enti sehari syif bisi 12 jam kami bisi 20 iku raban ba siti syif, tang enti syif 24 jam reti iya bisi 35 raban gawa sereta aku udah minta kereban ke dikena mega seruran disediaka.
"Kitai nguji enggau pengabis manah, Hari Empat, Lima enggau Hari Enam tu sebedau sesi belajar enggau ngajar berengkah baru," ku iya.