Anda di sini

Kelakuka produk tauka servis chara beraban nengah ‘online’

 Sepawie (duduk tengah) begambar enggau pesereta ‘Kelas Pemasaran Atas Talian eUsahawan’. Bisi dipeda mega iya nya orang ke ngajar bala orang dagang digital Wan Najib Wan Hamdan (dua kanan).
UNGKUP KENANG: Sepawie (duduk tengah) begambar enggau pesereta ‘Kelas Pemasaran Atas Talian eUsahawan’. Bisi dipeda mega iya nya orang ke ngajar bala orang dagang digital Wan Najib Wan Hamdan (dua kanan).

KOTA SAMARAHAN: Bala orang dagang patut berundingka ngelakuka dagang nengah chara beraban dikeena ngelakuka produk tauka servis sida nengah ‘online’.

Chairman Serakup Pengintu Pengelantang Pendiau Melayu Bagi Menua Kuching enggau Samarahan Sepawie K. Alwi madah raban tim deka bulih pemaik baka belajar teknik ngelakuka dagang nengah online ke ngasi agi.

“Ukai semua orang dagang ngembuan pengelandik ngelakuka dagang nengah online ke manah.

“Nyema kitai begulai dalam siti tim, kitai ulih belajar ari bala pangan kitai iya ke bisi pengelandik ke lebih manah ari kitai,” ku iya lebuh bejaku ba pengerami nutup ‘Kelas Pemasaran Atas Talian eUsahawan’ di Dewan Suarah Kota Samarahan Hari Enam nyin  tadi,

Iya ngansak bala orang dagang ngambika seruran ransing belajar nambahka penemu sentang ngelakuka dagang awak ke nyadi orang dagang ti mujur.

Sepawie mega madah kelimpah ari ngatur kelas ngelakuka dagang nengah online, PKMKS bisi ngatur aktiviti ke bepelasarka pengerai.

Iya nambah, taja pan aktiviti bepelasarka pengerai nya batang aktiviti serakup, iya mega ngatur aktiviti ke luar skop pengerai laban aktiviti tu ulih meri empas ngagai pengelantang komuniti.

Iya madahka PKMKS deka ngatur sesi penerang bekaul enggau bantu duit ungkup orang dagang Asajaya kena Hari Enam tu di Opis Pelilih Menua Asajaya.

Nitih ku Sepawie, sesi penerang nya tampung ari kelas ngelakuka dagang nengah online ke udah diatur kena 20 Julai bulan tu tadi.

PKMKS deka ngatur siri ke-3 kelas dagang nengah online di Batu Kawa kena 25 Ogos tu ila.