Anda di sini

Dikemanah pengudah dikemendar Opis Menteri Wang

 Manyin nerangka pasal pemansang sekula tuai sereta pemadu repuk di Sarawak, seraya disempulang (ari kanan) Gunakumaran enggau Raja Nazhatul. — Gambar Muhd Rais Sanusi
AUM PENGARANG BERITA: Manyin nerangka pasal pemansang sekula tuai sereta pemadu repuk di Sarawak, seraya disempulang (ari kanan) Gunakumaran enggau Raja Nazhatul. — Gambar Muhd Rais Sanusi

KUCHING: Bisi 37 buah sekula tuai sereta pemadu repuk di Sarawak deka berengkah dikemanahka sereta digaga baru pengudah dikemendar Opis Menteri Wang.

Menteri Pelajar, Sains enggau Pansik Teknologi, Dato Sri Michael Manyin Jawong madah 37 buah sekula nya ti pemadu dikemeratka dulu sereta ripih sekula nya udah dianjung ngagai Opis Menteri Pelajar Malaysia (KPM).

Nitih ku Manyin, pekara nya bisi udah ditanya iya ngagai Menteri Pelajar Malaysia Dr Maszlee Malik maya ti  berandauka pekara nya di Kuala Lumpur apin lama.

“Minggu nyin kemari kami bisi betemu sereta berandau lalu aku bisi nelai menteri (KPM), dia menteri madah nganti gerah ari menteri wang.

“Lebuh udah bisi jaku gerah ari menteri wang, kitai ulih berengkah. Kitai deka bejadika iya, lalu menteri iya empu datai bejadika nya ila.

“Kitai (Sarawak) udah sedia, kami udah nganjung ripih nama sekula ti patut dikemeratka dulu ngagai opis menteri (KMP) di Kuala Lumpur,” ku iya ti enda madahka bagi nama sekula nya.

Manyin meri penerang nya dalam aum pengarang berita lebuh ditanya pasal pemansang isu sekula tuai ti pemadu repuk di Sarawak ti ke patut iya berengkah digaga tauka dikemanahka agi ba bulan tu.

Dulu ari nya Manyin ngarika Kepala Menteri Datuk Patinggi Abang Johari Tun Openg bejadika Aum besai Antarabansa MELTA Ke-28 ba sebuah hotel ditu,kemari.

Iya madahka ke diatu tinda projek ngaga sereta ngemanahka sekula tuai ti kelalu repuk bedau dipansutka.

“Lebuh (KPM) udah nerima gerah (ari menteri wang), sida (KPM) deka ngerah kitai udah nya baru kitai berengkah bejalaika tinda,” ku iya seraya nandu lebuh dikerandau Utusan Borneo.

Lalu tebal agi sekula tuai ti pemadu repuk iya nya sekula menua pesisir.

Ba bulan Julai tu tadi ba sebengkah pengerami Manyin madah bisi lima buah sekula tuai sereta pemadu repuk di nengeri tu entara raban keterubah deka dikemanah enggau digaga baru pengudah bayar RM350 juta diungkupka sebarang maya taun tu.

Iya madahka lima buah sekula nya entara 415 buah sekula ti dalam ketegori pemadu repuk ti udah dipesetuju asil aum entara pemesai opis menteri iya begulai enggai Opis Menteri Wang enggau Opis Menteri Pelajar.

Iya madahka Sarawak nadai penanggul mayar pulai RM350 juta ari RM1 bilion ti deka diberi sereta sedia mayar enda ngira maya.

Taja pia ku iya, penyampau RM1 bilion nya enda ulih dibayar magang taun tu, ke alai Kepala Menteri udah nulis surat ngagai Opis Menteri Wang iya nya kitai deka mayar RM350 juta taun tu lalu laluh dibayar taun baru.

Sama bisi dalam aum pengarang berita nya kemari Raja Puan Bear Perak Darul Ridzuan Raja Nazhatul Shima Sultan Idris A’fifullah Shah, Presiden MELTA (Malaysian English Language Teaching Association) Prof. Gunakumaran Subramaniam sereta Sapit Ketuai Direktor Pelajar Malaysia Datuk Sulaiman Wak.