Anda di sini

Bekelimat ngena ai maya musim kemarau

 Juanda (baju burak, tengah) begambar enggau perabak ke bisi datai ngulu pengerami nyerahka tangki ai bedau lama udah.
NYADI KENANG: Juanda (baju burak, tengah) begambar enggau perabak ke bisi datai ngulu pengerami nyerahka tangki ai bedau lama udah.

MUKAH: Rayat dilalau bekelimat ngena ai ba pengidup besesehari.  

Kaban Kunsil Nengeri (ADUN) Jemoreng Datuk Dr Juanda Jaya madah, Opis Bekal Ai Menua Pesisir (JBALB) udah mansutka jaku gerah ke alai paras ai majak mabu ketegal musim kemarau.

“Musim kemarau enda ulih diseliahka lalu JBALB mega udah mansutka jaku gerah ke alai paras ai mega majak mabu,” ku iya ba sebengkah pengerami nyerahka tangki ai ngagai lapan buah rumah panjai enggau genturung pendiau di semanjai Batang Igan bedau lama udah.

Bisi 196 tangki ai disua nitihka guna enggau penyampau tubuh peranak di menua nya.

Sama bisi datai Residen Mukah Hamdiah Bakir enggau Pemesai Pelilih Matu, Wan Hipni Wan Mohamad.

Ku iya, pemeri tangki ai nya siti ari perengkaguna ngambika peranak di menua nya ulih ngena sereta ngemudahka aktiviti ninting hari sida.

Taja pan ungkup sementara aja, nya dikearap ulih nyaup guna peranak penaka dia laban projek paip deka disambung pengudah   jalai di menua nya tembu digaga ila.

“Projek paip mega deka disambung ngagai Kampung Kebuaw, tang disambung pengudah jalani alunari Igan ke Sungai Ilas enggau ke Bungan Kecil tembu ila,” ku iya.

Berebak enggau nya, Juanda mega ngelaluka sebana ari mensia mayuh tang mesti disempulang enggau ripot sereta bukti.

Tu dikena nentuka ripot nya ukai ripot palesu lalu atur lengkas sereta betul ulih dipejalaika.

Ku iya baru, nya siri chara kereja ti dikemeranka ari  baruh perintah ke dipegai Gabungan Parti Sarswak (GPS) ti amat beratka pengelantang pendiau rayat.