Anda di sini

Bala Koperal David sebilik mupuk ke Kedah sehari tu

Fatimah beratika tiket bilun seraya diperatika (ari kanan) Morni enggau Nur Lina sereta (ari kiba)Zayadi, Chai, Edmund enggau Teresa sebedau mupuk ke Kuala Lumpur, ba KIA ditu, sehari tu.
Fatimah beratika tiket bilun seraya diperatika (ari kanan) Morni enggau Nur Lina sereta (ari kiba) Zayadi, Chai, Edmund enggau Teresa sebedau mupuk ke Kuala Lumpur, ba KIA ditu, sehari tu.

Dikarang Rengenyan Labang

KUCHING: Bala Koperal David Edmund Rapi, 39, sebilik bepengarap tinggi ulih bulih penerang sereta progres pemadu baru ari Raban Soldadu Malaysia (ATM) bekaul enggau pengelenyau David.

Sehari tu, apai indai David iya nya Edmund Rapi Idal enggau Teresa Hamline Neh sereta menyadi David, Morni Edmund Rapi enggau Nur Lina Aisyah Edmund Rapi mupuk ke Kuala Lumpur udah nya terus ke Alor Setar, Kedah ti disempulang pegawai ari Unit Keselamatan dan Penguatkuasaan Negeri, Zayadi Sebeli.

Tuju Edmund enggau sida sebilik deka ngagai kem soldadu nya laban deka ngambi barang David.

Lalu ungkus penerebai ditanggung ulih Perintah Sarawak.

Morni ti ngarika sebilik bejaku meri terima kasih ngagai semua piak ke udah mantu sereta rayat Sarawak ke udah meri sukung moral ngagai sida iya.

Iya ngarapka pekara ke nyadi lebih agi bantu ari Perintah Sarawak enda dipolitikka.

"Kami amat ngarapka pengeran kami enggau piak perintah nengeri kin ngenataika asil sereta ngarapka bisi kerejasama manah laban kami nengah chara ti betul datai kin ti bepun ari pengeran kami empu nyentuk kami minta bantu enggau champur tangan perintah nengeri.

"Enggau dikearapka mega anang dipolitikka pekara tu laban enti ukai perintah nengeri sapa agi kti deka mantu kami.

"Terima kasih ngagai Perintah Sarawak, ketuai renggat atas perintah nengeri ti udah mantu nyentuk ngagai peringkat tu. Pia mega ngagai Kepala Menteri, bala pegawai sereta (Menteri Pengintu Pengelantang Raban Bansa, Orang Indu, Ruang Bilik enggau Pemansang Anak Mit) Dato Sri Fatimah, Unit Keselamatan dan Penguatkuasaan Negeri (UKPN) sereta semua rayat Sarawak ke udah meri sukung moral nggagai kami nyentuk diatu," ku iya.

Morni bejaku ngarika sida sebilik bejaku dalam aum pemberita bantu Perintah Sarawak ngagai orang ti sebilik enggau raban soldadu ke lenyau ba Pulau Perak, ti diatur ba Padang Bilun Antarabansa Kuching (KIA) ditu, sehari tu.

Sida lima sehari tu ke Kuala Lumpur ngena bilun pukul 10.15 pagi, sereta ari Kuala Lumpur ke Alor Setar ngena bilun 2.30 lemai lalu udah nya ari Alor Setar ngena jalai darat ke kem soldadu.

Pulai baru ke Kuching ditimpuhka 17 Ogos tu, Hari Enam.

"Kami chukup ngarapka lebuh datai din ulih betemu enggau pegawai ti betanggungjawab sereta ngarapka Kem Ejutan ulih meri kami penerang pasal pengelanyau dua raban soldadu tu.

"Laban nyentuk sehari tu nadai penerang ti betul tauka amat diberi ngagai kededua ruang bilik, bakani pengelenayau? Bakani bansa operasyen ngiga enggau nyelemat dipejalaika? Kami (ngelama tu) semina bulih penerang keterubah ti semina madah lenyau aja.

"Nya pekara ti dikemeratka kami enti betemu enggau pegawai renggat atas ba kem nya," ku Morni.

Sida lima ti mupuk ari KIA dianjung ulih Fatimah enggau Direktor UKPN Datuk Dr Chai Khin Chung.

David, 39 taun asal ari Kampung Baru Cina, Dalat enggau Lans Koperal Moses Logers 25 taun asal ari Kampung Senibong, Bau diriputka lenyau maya gawa ba kandang endur Operasyen Pejarak ba Pulau Perak, Kedah kenyau 19 Julai taun tu tadi.

Pengelenyau seduai iya ditemu maya ketuai palan meresa baris sereta ngitung tubuh raban nya.