Anda di sini

Pengawa ngaga sekula repuk deka berengkah dipejalaika pengudah nerima gerah Opis Menteri Wang

MANYIN

Dikarang Rengenyan Labang

KUCHING: Pengawa ngaga tauka ngemanahka sekula tuai sereta pemadu jai di nengeri tu deka berengkah dipejalaika enti udah bisi gerah ari Opis Menteri Wang.

Menteri Pelajar, Sains enggau Pemansik Teknologi, Dato Sri Michael Manyin Jawong madah minggu nyin kemari piak iya bisi betemu sereta baum enggau Opis Menteri Pelajar (KPM) bekaul enggau isu nya.

"Minggu nyin kemari kami bisi betamu sereta berandau lalu aku bisi nelai menteri (Dr Maszlee Malik), dia menteri madah nganti gerah ari menteri wang.

"Nya alai, lebuh udah nerima gerah ari menteri wang, kitai ulih berengkah. Kitai deka bejadika iya, lalu menteri iya empu datai bejadika nya ila," ku iya lebuh ditanya bekaul isu nya maya aum pemberita Aum besai Antarabansa MELTA Ke-28 ba sebuah hotel ditu, sehari tu.

Iya madahka ke diatu tinda projek ngaga sereta ngemanahka sekula tuai ti pemadu jai bedau dipansutka.

"Lebuh (KPM) udah nerima gerah (ari Menteri Wang), sida (KPM) deka ngerah kitai udah nya baru kitai berengkah bejalaika tinda," ku iya nandu nya baru lebuh dikerandau Utusan Borneo.

Iya madahka ripih 37 buah sekula tuai ti kelalu jai ke patut dikemeratka dulu udah dianjung ngagai Opis Menteri Pelajar Malaysia (KPM).

Lalu tebal agi sekula nya di menua pesisir.

"Kitai (Sarawak) udah besedia, kami udah nganjung ripih nama sekula ti patut dikemeratka dulu ngagai opis menteri (KPM) di Kuala Lumpur," ku iya ti enda nyebut bagi sekula.