SIBU: Kualiti angin ditu mandangka ba ikas enda manah ke pengerai enggau bacha Indeks Pengamah Angin (API) 174 urung pukul 2 lemai kemari.
Kandang pasar tebing sungai udah ngerikodka bacha (API) ketiga pemadu tinggi di nengeri tu.
Stesyen alai matau di SK Kuala Baram 2 nya siti ari palan ke pemadu tinggi API di nengeri tu ke dirikod bacha pengamah angin 342 ti tau ngeruga pengerai.
Bacha API ba sekeda palan alai mantau- ILP (Palan Pemantih Industri) Miri (297), Sri Aman (105), Sarikei (96), Miri (95), Mukah (85), Bintulu (84), Samarahan (81), Kuching (80), Samalaju (75), Kapit (64) enggau Limbang (55).
Bacha API di Sibu ngerikodka 100 urung pukul 11 malam Hari Minggu, niki ngagai 118 ari 97 pukul 10 malam.
Tebal agi sekeda pasar ke bisi sebun asap ngembuan angin ti bau asap.
Gaya penampak semanjai Sungai Rajang mega bekurang, ke alai tebing sungai ari sepiak-sepiak pan enda ulih dipeda.
Bacha API ari 0 nyentuk 50 nya beresi, 51-100 (jelan pemeresi), 101-200 (enda manah ke pengerai), 201-300 (ngeruga pengerai), enggau ngelui 301 (mai penusah ke pengerai).
Kena Hari Minggu (11 Ogos), imej satelit ngayanka 61 titik angat di Borneo, 56 di Kalimantan lalu 5 ba kandang menua Sabah enggau Sarawak.
Bisi dua endur angat ditemu di Sumatra.
Berebak enggau nya, Penulung Kontroller Kaunsil Sungai Sarawak (LSS) Sibu Hatta Morshidi madahka kemari nadai penanggul ke ngachau pejalai bot ekspres.
“Operasyen bot ekpres bejalai baka selama, ku iya.
Opis Pengerara Api enggu Penyah Penusah (Bomba) ditu kena Hari Minggu bisi nerima 11 kes penusah angus, enam diterima ba Balai Bomba Sentral Sibu lalu lima diterima ba Balai Bomba Sungai Merah.
Bacha API 390 nya enda likun ke pengerai, kelebih agi ngagai nembiak mit, orang tuai, orang ke nginsap enggau orang ke bisi napi penyakit tungkul ati enggau lempuang.
Berebak enggau nya, Sapit Menteri Pengerai Dr Lee Boon Chye madahka mensia mayuh deka mirah mata enggau rangkai rekung ketegal nya.
Semua orang dipinta ngambika enda ngaga pengawa ba luar. Kena sengkabung mua enti pansut. Ngirup mayuh agi ai enda nyengkaum orang ti bisi napi sakit tungkul ati. Ungkup orang ke bisi napi penyakit tungkul ati, sida patut ngagai pengerai ti semak minta jaku lalau ari sida, ku iya ngelalau.