Anda di sini

Peminta masuk CMIEA 2019 udah dibuka diatu, ditutup kena 17 Sept

 Naroden (tiga kiba) enggau Abang Abdul Karim (empat kanan) bejadi CMIEA 2019 ti ngelai peminta nyereta CMIEA nya udah dibuka, seraya diperati Sabariah (dua kiba).
TAU MINTA DIATU: Naroden (tiga kiba) enggau Abang Abdul Karim (empat kanan) bejadi CMIEA 2019 ti ngelai peminta nyereta CMIEA nya udah dibuka, seraya diperati Sabariah (dua kiba).

KUCHING: Peminta masuk ‘Anugerah Kecemerlangan Industri Ketua Menteri (CMIEA) 2019’ udah dibuka lalu hari kepenudi nganjung peminta nya kena 17 September 2019.

Sapit Kepala Menteri, Datuk Amar Awang Tengah Ali Hassan, madahka CMIEA iya nya program dikena  meri basa enggau ngaku orang dagang nyulut di Sarawak.

Maya CMIEA keterubah diatur ba taun 2017, bisi 20 buah kompeni nerima gelar tauka diaku baka Samling Housing Product Sdn Bhd., Weida Integerated Industries enggau Press Metal Bintulu Sdn Bhd sereta ke bukai.

“Orang dagang mit enggau jelan pemesai (PKS) mungkur 98.5 peratus orang dagang di Malaysia, nyengkaum di Sarawak, aku ngarapka mayuh agi PKS deka nyereta CMIEA 2019.

“Nengah rambai jaku ‘Productivity  for Prosperity’, tuju CMIEA Sarawak iya nya ngambika ulih terus ngemanahka proses enggau chara dagang dikena nyapai semua aspek penyulut organisasyen enggau ngenegapka agenda perintah dalam pengawa ngangkatka produktiviti menua,” ku iya.

Awang Tengah  ti mega Menteri Pemansang Industri enggau Orang Dagang mansutka pekara nya dalam teks jaku iya ti dibacha Menteri Muda E-Dagang Datuk Mohd Naroden Majais nyerumba pengawa bejadi CMIEA 2019 ba Begunan Yayasan Sarawak, Jalan Masjid ditu, kemari.

CMIEA diatur Persekutuan Persatuan Perniagaan Sarawak (SBF) lalu disukung Perintah Sarawak.

Bisi empat kategori ti diperebutka ba CMIEA 2019 iya nya Category Micro ungkup kompeni domestik enggau penguntung ari bejual enda ngelui ari RM300,000; Category Small ungkup kompeni domestik enggau penguntung ari bejual  RM300,000 ngagai RM 3 milion; Category Medium ungkup kompeni domestik enggau penguntung ari bejual RM 3 milion ngagai RM20 milion sereta Category Large ungkup kompeni domestik enggau penguntung ari bejual  enda lebih ari RM 20 milion.

Dulu ari nya dalam jaku pengelalu, Presiden SBF, Datuk Abang Abdul Karim Tun Openg madahka CMIEA diangkat ari Anugerah Kecemerlangan Industri (AKI) ti diatur SBF enggau kerejasama Malaysia Productivity Corporation (MPC) dikena ngelakuka budaya dagang enggau inovasyen.

Ku Abang Abdul Karim, kompeni dipeda ngena Business Excellence Framework (BEF) ti diaku renggat antarabansa nyadi kelai pemujur. “CMIEA taun tu deka disua maya Makai Serumpu Ninting Taun SBF ti mega Malam Pengerami Besai CMIEA ba bulan Oktober ke alai Kepala Menteri deka nyadi temuai dipebasa,” ku iya.

Penerang silik bekaul enggau SBF CMIEA Gala Night 2019 tau ditanya ngagai Sekretariat SBF ba admin@sbf.org.my tauka 082-237148.

Bisi datai kemari, Sapit Sekretari Perintah Nengeri (Transformasi Prestasi dan Penyampaian Perkhidmatan) Datu Dr Sabariah Putit enggau ke bukai.