MIRI: Menteri Wang Lim Guan Eng nadai ngembuan pengelandik ba penaluk ke menua dalam politik iya ba pekara ngemanahka sekula ti udah repuk di nengeri tu, ke alai perintah nengeri udah dulu merambu deka mayar RM1 bilion dulu ari bayar duit jali perintah besai dikena bejalaika tuju tu.
Iya patut ngena pemintar lalu ukai mangkit isu tu ba hari maya semua rayat Sarawak gaga ati berami ngingatka hari ti pemadu besejarah ba sida.
Menteri Muda Kunsil Kandang Menua ke mega mandal presiden PDP, Datu Dr Penguang Manggil madah tu ba timbal iya ngagai penerang Lim Guang Eng maya Hari Sarawak ti madahka Perintah Nengeri patut mayar RM350 juta dulu sebedau perintah besai meri agih ngagai nengeri dikena ngangkatka manah sekula ke udah repuk di nengeri tu.
“Nyadi Menteri Wang menua Malaysia, iya patut lebih pintar, lurus, konsisten enggau ngempu tanggungpengawa ba jaku ti dipansutka iya, lalu ukai patut nitihka ati sereta bejaku sepeneka ati, baka ke suah digaga iya,” ku iya.
Dr Penguang madah barang bagi aja bajet ti dikena ngemanahka sekula di Sabah enggau Sarawak patut dibantaika sereta dikemendarka senat enggau parlimen lalu udah disain ba ujung taun 2017.
Perintah PH nangguh agih belanja taun dulu nyin kemari enggau nadai sebarang penetap, lalu Lim patut nemu ke alai pelajar nya ari baruh tanggungpengawa perintah besai.
“Nyadi dalam pekara tu ukai semina betangguh aja sereta ngaga isu ngemanah sekula nya nyadi pekara politik, laban tu sentang tuju pengidup bala nembiak kitai enggau rebak dudi ila.
Dr Penguang madah, Lim patut nemu ke alai Sabah enggau Sarawak ukai semina nengeri di Malaysia tang kededua nengeri nya nengeri ti begempung enggau Nengeri Tanah Melayu numbuhka Malaysia dalam taun 1963.
Lim lebuh ti nemuai ke Sarawak udah ngasuh perintah enggau parti GPS di Sarawak teguran ati lebuh iya madahka nengeri Sarawak deka tengkerap dalam timpuh tiga taun ti deka datai enti terus melanja RM11 bilion dalam bajet ninting taun.
Orang ti bejalaika pengawa ekonomi enggau orang politik udah mantah penemu nya, ke alai bisi sekeda betanyaka sekali ke iya patut nyadi Menteri Wang Malaysia, laban ti ngaga penerang sepeneka ati ti ulih meri empas ngagai orang ti beranakka puku antarabansa enggau meri empas ngagai ekonomi.
Menteri Wang, ke mega Sekretari Besai DAP, dalam penerang iya kena Hari Satu (22 Julai) madahka perintah besai udah sedia nyali duit sepenyampau RM350 juta ngagai perintah Sarawak enggau tuju dikena ngemanahka sekula ti repuk di nengeri nya, tang enggau penetap pengudah mayar sama penyampau nya dulu.
Iya madahka Kepala Menteri Datuk Patinggi Abang Johari Tun Openg udah madah sanggup mayar pulai RM350 juta ngagai Putrajaya ba awak ke semak, ti nyadi renggat keterubah mayar pulai baru duit ke dijali enggau penyampau RM1 bilion.
Lim madah nengah bayar nya, sekeda ari isu ulih diputarka, baka timpuh ti deka dipejalaika, rintai nama sekula enggau proses tinda ungkup projek nya.
Opis Menteri Wang pechaya renggat keterubah projek ngemanahka sekula di Sarawak deka dipejalaika sebedau ujung taun 2019 enti bisi kerejasama enggau pengelurus ari semua.
Lim mega madahka perintah Sarawak agi bisi utang enggau Putrajaya sepenyampau RM2.352 bilion nyentuk 30 Jun taun tu, seraya madahka laluh duit jali perintah nengeri ari perintah besai deka nyadi RM1.352 pengudah ke mayar pulai RM1 bilion.
Perintah Besai udah setuju nerima bayar duit jali RM1 bilion perintah Sarawak dikena ngemanahka sekula repuk di nengeri tu, bepanggai ba empat penetap ti udah disetuju kededua piak.
Ketuai Pemadah Parti Pesaka Bumiputera Bersatu (PBB) Dato Idris Buang dalam penerang iya ningkah penerang Lim lalu enda kiruhka penerang nya tang kebendar Malaysia ke mayuh agi utang enggau Sarawak dalam mayuh chara, lalu tanggungpengawa kunstitusyen perintah besai dikena nyendia belanja dikena ngemanahka sekula di Sarawak.
Iya madahka penerang nya enda diplomatik, enda kemerah enggau enda bebasaka Sarawak lebuh rayat Sarawak nyambut pengerami Hari Sarawak lalu pengerami nya patut mega disambut bala menteri ari perintah besai.