LUBOK ANTU: Pengawa berumah baru peranak 26 pintu Rumah Lepang, Sayat di Engkilili udah bekau ke angus empai lama deka disaup Kaban Parlimen Lubok Antu Jugah Muyang.
Kilah ensana, iya ngelawa rumah panjai nya sereta ngungkupka RM100,000 dikena meli ramu ngambika bisi dikena ngentak baru.
Kelimpah ari nya ku iya madah, Palan Servis Rayat Parlimen Lubok Antu mega deka nyaup sida rumah panjai nya baka bebelika ramu dikena ngaga ensarau seraya nganti berumah baru.
“Pia mega terima kasih ngagai sida ke bela datai nganjung tulung baka ejensi koporat, opis ukai dikuasa perintah (NGO) sereta bala bukai.
“Tu mandangka semua kitai enda ngira bansa, jalai pengarap tauka penemu politik ngiarka pekara nya dulu tang bela datai nyaup sida ke ditinggang penusah,” ku iya madah maya datai nganjung bantu nya, kilah ensana.
Jugah madah, taja semua reta abis magang ketegal penusah angus nya tang iya berasai lantang ati laban nadai penusah bebadi nyadi.
Kelimpah ari nya, maya tu mega iya berandau enggau peranak rumah panjai nya mendingka sebana rayat dia sereta ngena awak nya meda kediri pendiau sida dia ke diatu diau ba ensarau dulu.
Nambahka nya, iya bela ngungkupka RM20,000 bantu penusah kudi menua ngagai peranak 167 iku rumah panjai nya.