LAWAS: Tepejuh gian dadah ngerugika diri lalu bisi dua iku diri menyadi entara lima sida ke ditan ba pengawa meresa ngenyit ‘Ops Perdana’ ba pelilih menua tu pagi Hari Satu tu tadi.
Operasyen nya dipejalaika pukul 2 pagi betuaika Ejensi Antidadah Bansa(AADK)Limbang enggau AADK Pelilih Menua Miri.
Ketuai Operasyen Opang Melay madahka kelelima suspek ke ditan beumur entara 21 ngagai 51 taun, ba genturung pendiau Banting, Lawas Damit sereta nyengkaum kelingi kandang menua Lawas.
Iya madah, asil ari nangkap semua sida nya, opis iya bisi tetemuka sekeda kereban nginsap dadah maya bejalaika operasyen ke sama.
Berebak enggau nya, di Limbang bisi diri sebilik apai enggau anak entara ke lima lelaki ke ditangkap AADK Limbang dalam Ops ke sama kena pagi Hari Enam nya. Nitihka penerang Opang, operasyen nya udah mujur tetemuka lima iku ke gian dadah ari tujuh iku ke ditan beumur dalam 19 ngagai 43 taun.
Nitihka penerang iya, kelelima suspek ke dipansik positif dadah bansa methamphetamine (syabu) ti datai ari mayuh bengkah bansa.
Operasyen di Limbang ku iya, dipejalaika ba Kampung Malagangai, Desa Pabahanan enggau ke ngelingi kandang menua Limbang.
Semua sida ke ditan deka dipansik ari baruh Seksyen 3 ‘Akta Penagih Dadah Rawatan dan Pemulihan 1983’.