Anda di sini

Uggah enda nemu alai penyangkai Dr Jerip pengudah ninggalka PSB

 Temenggong Iban Bagi Menua Kuching Datu Bernard Agan (enam kiba) nyuaka tepa ngagai Uggah.
KE PENGINGAT ARI KAMI: Temenggong Iban Bagi Menua Kuching Datu Bernard Agan (enam kiba) nyuaka tepa ngagai Uggah.

KUCHING: Sapit Kepala Menteri Datuk Amar Douglas Uggah Embas madahka diri enda nemu sekalika Datuk Dr Jerip Susil bisi minta nyemilik Parti Pesaka Bumiputera Bersatu (PBB).

“Ukai aku nemu (nyema Dr Jerip) udah minta nyemilik  PBB,” ku iya malam ensanus lebuh ditanya pasal nya.

Taja pia, Uggah enggai nyaut agi lebuh ditanya sekalika   Dr Jerip bisi minta nyemilik parti nya.

Dr Jerip, ke mega Menteri Muda Perengka Pengangkut sereta Kaban Kunsil Nengeri Mambong, ensanus madahka diri ningkilka diri ari PSB, ke alai iya mega nyadi sapit presiden.

Iya madah ninggkilka diri ari PSB laban deka nyukung Gabungan Parti Sarawak (GPS).

Uggah, dulu ari nya ngulu Pengerami Makai Lemai Serakup Ketuai Raban Bansa enggau Tuai Rumah Bansa Iban (PERMAIK) ba sebuah restoren, ditu.

Uggah mega madahka bala kunsilor ke dichiri PSB, sebedau tu dikelala enggau nama United People’s Party (UPP), udah disilih.

“Bisi beberapa orang baru dalam rintai nama kunsilor, sida tu deka nyilih bala (kunsilor) ke udah dichiri UPP,” ku iya nyemetak.

Iya  mega madahka rintai nama nya deka dianjung ngagai Tuai Megai Menua (TYT) ngambika dikemendar, sebedau digazet lalu diterit berengkah 1 Julai.

Ba pekara bukai ke bekaul, Uggah deka ke PEMAIK numbuhka komiti dikena mantu komuniti Iban ke diau di Kuching.

Ku iya, mayuh raban bansa Iban ti diau di mengeri ke napi mayuh macham pemar.

Uggah mega meransang palan pengentap pendiau baru bansa Iban di mengeri nganjung profil palan pengentap  enggau penerang ke ulih mantu raban bansa nya  ngembuan pengidup ke meruan agi.  

“Bansa Iban ke diau di Kuching betapi enggau mayuh penanggul, sekeda nya ngentakka rumah ba tanah ti enda dikemendar, sekeda nya nadai kereja lalu bisi mega ngaul diri enggau pengawa ke enda manah.  

“Nya alai aku minta sida numbuhka komiti sereta nyendiaka  penerang ngamb ika kitai ulih ngiga chara  dikena mantu sida,” ku Uggah seraya madahka diri deka ke penerang dianjung ngagai iya ujung bulan baru.

Sama bisi ngulu pengerami nya Menteri Kunsil Kandang Menua enggau Pengawa Berumah, Datuk Dr Sim Kui Hian, Menteri Muda Kunsil Kandang Menua enggau Pengawa Berumah, Datu Penguang Manggil enggau ADUN Batu Kitang, Lo Khere Chiang.