Anda di sini

Ubah tikas umur pengundi diterima manah: Fatimah

 Fatimah meri penerang dalam aum pengarang berita pengudah tembu aum MT PWPBB ba Indu Opis PBB ditu, seraya diperatika kaban MT, kemari.
NYENDIAKA DIRI ENTAP AGI: Fatimah meri penerang dalam aum pengarang berita pengudah tembu aum MT PWPBB ba Indu Opis PBB ditu, seraya diperatika kaban MT, kemari.

KUCHING: Raban Orang Indu Parti Pesaka Bumiputera Bersatu (PBB) nerima enggau positif pasal ubah tikas umur pengundi ari 21 ngagai 18.

Ketuai Raban Orang Indu PBB Dato Sri Fatimah Abdullah madah, kebuah pia laban raban orang indu PBB pechara orang biak kitai enti dipeda nengah statistik ngarika lebih ari setegah peranak menua, ti patut diberi kuasa ngambi bagi dalam politik Malaysia.

“Sada raban biak enggau penyereta sida dalam pemansang menua patut diberi peransang ti nyadi sebagi ari sistem demokrasi kitai.

“Mungkur tauka ngaul raban biak ari sukut politik nya siti pekara ti manah laban sida ulih bulih pengelandik baru sereta ulih belajar enggau tebantai ngagai tanggungpengawa baru ke lebih besai.

“Ba kami Pampang Indu PBB (PWPBB), mansang ke mua dulu, nyengkaum nyikap diri empu bakani ngaul raban biak. Kitai patut nyikap diri empu dikena napi semua ubah dalam dinamik politik,” ku iya.

Fatimah mansutka pekara nya dalam aum pengarang berita pengudah iya nyadi chairman aum Kaunsil Tetinggi PWPBB ti diatur ba Indu Opis PBB ditu, kemari.

Bejaku baru, iya madahka pansik dalam semua pekara patut dipejalaika, nyengkaum pekara baka ‘trend’ raban biak ngundi sereta pekara ti nentuka pilih sida.

Strategi ke ulih meri peransang ngagai raban biak ngundi patut dipejalaika, laban enti bekaul enggau raban nya deka lebih mekuh ngagai pekara dalam perspektif ti bebida enggau baru, ku iya.

Raban biak ukai semina diberi awak dalam politik, tang mega penemu sida pasal semua isu ke ulih nguasa pengidup sida patut dikemeratka.

Ku iya, orang tuai tauka besai patut nyendiaka raban biak tanggungpengawa nyadi orang besai ke patut diberi penerang pasal udang-undang, atur, polisi,pelajar, servis, perintah, pengelikun, ekonomi enggau ke bukai.

“Kitai patut ngiring raban biak laban sida bisi hak ngaga pemutus ti betul sebedau bejalaika tanggungpengawa nyengkaum tanggungpengawa nyadi pengundi.

“PWPBB, kami tetap sereta tegap deka ngetanka Sarawak  nentuka kitai enda labuh ngagai jari orang ti nadai pengerindu dalam ati,” ku iya ti mega nyadi Menteri Pengintu Pengelantang Pendiau,Pengelantang Raban Bansa, Orang Indu, Ruang Bilik enggau Pemansang Nembiak Mit.

Dulu ari nya, Fatimah madahka PWPBB majak nyikap diri napi pengawa bepilih nengeri (PRN) ti deka datai nyengkaum pekara bekaul enggau raban pengawa bepilih parti.

Iya madahka parti kelebih agi PWPBB, deka chakah agi nerang ngagai rayat pasal penyulut ke dibai perintah GPS kelimpah ari meri pengandal ngagai rayat pasal pengari tauka chalun ke dipilih.

“Kitai nemu ba pengawa bepilih ke deka datai tu ukai baka pengawa bepilih ke udah, tang pengawa bepilih ke alai kitai deka nempuh mayuh pemar.

“Nya alai kitai patut nyikap diri tegap agi ari ke udah, enti suba tegap tang ke sekali tu kitai nyikap diri enggauentap agi,” ku iya seraya madah nya entara pekara dikerandau dalam aum nya ti digulu  47 pengari ari ranting tauka pampang ari serata nengeri tu, kemari.