Anda di sini

Pemutus Dr Jerip patut ulih diterima semua

KUCHING: Pemutus Menteri Muda Perengka Pengangkut, Datuk Dr Jerip Susil ti pansut ari Parti Sarawak Bersatu (PSB) pemutus ti tusah mar digaga iya sereta patut diterima ulih semua orang.

Ketuai Raban Orang Indu Parti Pesaka Bumiputera Bersatu (PBB) Dato Sri Fatimah Abdullah madah, Dr Jerip ngaga pemutus nya laban iya chukup beratka rayat kelebih agi raban bansa Bidayuh.

“Iya (Dr Jerip) udah ngaga pemutus, kitai patut nerima pemutus nya laban nya pemutus ke digaga iya empu.

“Nitihka penerang berita iya (Dr Jerip), iya madah nya siti pemutus ti mar deka digaga tang pengudah berunding enggau orang dalam sitak ti diarika iya, Dr Jerip  ngasaika pemutus ke patut digaga iya nya meri servis ngagai rayat dalam sitak iya enggau ke penyerakup raban bansa Bidayuh,” ku iya lebuh dikerandau raban pengarang berita.

Dulu ari nya, Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Anak Mit nya nyadi chairman aum Kunsil Tetinggi raban orang indu PBB, ti diatur ba Indu Opis PBB ditu, kemari.

Nambahka nya, ditanya pengarang berita sekalika Dr Jerip ti nyadi Kaban Kunsil Nengeri (ADUN) Mambong  deka nyereta parti bukai, Fatimah madahka, nya patut ditanya ngagai iya empu.

Tang ku Fatimah, naka kemari bisi parti dalam gempung Gabungan Parti Sarawak (GPS) bisi nukangka pintu ngagai Dr Jerip.

“Sehari tu (kemari) aku bisi macha ba surat berita ke alai Parti Demokratik Progresif (PDP) iya nya Datuk Henry Jinep udah nukangka pintu ngagai iya (Dr Jerip),” ku iya seraya madahka diri arap bendar Dr Jerip deka ngaga sebarang pemutus pengudah berunding panjai.

Kemari, Dr Jerip madahka diri pansut ari PSB tekala nya, lalu pekara nya ditukuka iya nengah surat rasmi ngelengkaka pangku pengawa iya ari nya.

Dr Jerip ti mega sapit presiden PSB nengah surat nya madah, nya pemutus iya pengudah beratikapenemu enggau ljaku alau penyukung nyengkaum rayat dalam sitak DUN Mambong.