Anda di sini

Hari Sarawak deka diintu enggau penuh prestij

Advertisement
 Dr Rundi (tengah) disempulangka (ari kiba) Lawan, Dr Annuar, John enggau Dr Abdul Rahman ba aum media ba pengawa ngintu Hari Sarawak.
BELA NGERAMI: Dr Rundi (tengah) disempulangka (ari kiba) Lawan, Dr Annuar, John enggau Dr Abdul Rahman ba aum media ba pengawa ngintu Hari Sarawak.

KUCHING: Pengerami Hari Sarawak ke diintu kena 22 Julai tu di Bintulu deka diatur enggau penuh prestij ke alai tujuh bengkah program ke manah mega sama deka diatur.

Menteri Utiliti Dato Sri Dr Stephen Rundi Utom madah, pengerami Hari Sarawak taun tu chukup manah laban keterubah deka diatur ba luar Kuching.

“Nyadi tu mih peluang ke pemadu manah ngagai rayat di Bintulu enggau peranak ke ngelingi sama meda pengerami hari besejarah nya ungkup Sarawak.

“Tu beguna amat ngagai rayat Sarawak kelebih agi rebak biak ngambika nemu sentang sejarah kitai ke merintah kediri nengeri kitai  kena 22 Julai 1963 ari perintah British 56 taun ti udah ,” ku iya.

Iya madah munyi nya ba aum pengarang berita pengerami Hari Sarawak di Menara Lembaga Pembangunan dan Lindungan Tanah (PELITA), The Isthmus ditu, kemari.

Tambah Dr Rundi, aum Kunsil Nengeri (DUN) keterubah diatur di Bintulu maya nya, lalu tu besai amat reti ba pengawa milih bagi menua nya nyadi tuai pengatur ngintu pengerami Hari Sarawak.

“Nya alai, aku ngelaluka peranak menua Bintulu enggau ke ngelingi ngerebut peluang tu sama ngintu sereta nyereta aktiviti ti bisi diatur,” ku iya.

Berebak enggau nya, iya minta rayat di nengeri tu nambaika menira Sarawak ba rumah enggau premis sida ngambika nyadi kelai sayau enggau bebasaka nengeri Kenyalang ti betuah tu.

Bekaul enggau tujuh bengkah aktiviti ke manah nya, Dr Rundi madah entara nya Sarawak E-Sport 2019 ti deka diatur ba Naim Street Mall Bintulu kena 20 nyentuk 22 Julai tu, Sarawak Day Run (21km) Wisma Bintulu, Tanung (21 Julai) pukul 7 pagi sereta Pengerami Ngintu Selamat di Masjid Asssyakirin, Bintulu kena 21 Julai pukul 6 lemai.

“Kelimpah ari nya, ‘Konsert Kamek Sayang Sarawak’ ba Jalai Padang Bilun Lama, Bintulu kena 21 Julai (4 lemai nyentuk 8 malam) lalu deka beperindang enggau penanyi ti tebilang baka Hafiz Suip, Ricky Andrewson, Melissa Francis, Rosiana Urai, Claudia Geres, Firdaus Materang, Roxane enggau Cipta Band sereta penanyi popular Baby Shima,” ku iya.

Aktiviti ke bukai, Gempuru Hari Sarawak ba Jalai Padang Bilun  Lama kena 22 Julai, pukul 9 pagi ke dipelaba deka digulu Tuai Megai Menua ( TYT) Tun Pehin Sri Abdul Taib Mahmud enggau Kepala Menteri Datuk Patinggi Abang Johari Tun Openg.

“Berebak enggau nya mega, kitai mega ngatur Pemandang Hari Sarawak di Naim Street Mall berengkah 22 nyentuk 28 Julai 2019.

“Aktiviti ke bukai iya nya’Love Sarawak Through History’ ke diatur Opis Menteri Pelajar, Sains enggau Pansik Teknologi sereta Opis Pelajar Sarawak, ku iya.

Tambah iya,’Love Sarawak Through History’ nyendiaka aktiviti ke bukai baka Kuiz (20 Julai) ba Sekula Primari Bintulu,’Story Telling’(20 Julai) di Sekula Primari Agama (Opis Islam Sarawak), Pekit Ngelinsu enggau Forum kena 21 Julai ba The Springs.

Sama bisi ngulu aum tu Menteri Muda Pelajar enggau Pansik Teknologi Dr Annuar Rapaee, Menteri Muda Undang-undang enggau Adat Bumiputera Datuk John Sikie Tayai, Menteri Muda Bekal Ai Datuk Liwan Lagang, Menteri Muda Betanam Betupi Dr Abdul Rahman Ismail sereta bala temuai ti dipebasa ke bukai.

Advertisement