KUCHING: Nyauka 100 iku peranak rumah panjai ari Munggu Demam Undup di Sri Aman nyemilik Parti Tindakan Demokratik (DAP).
Chairman DAP Sri Aman, Leon Donald Jimat nengah penerang iya kemari madah, iya nerima peminta nyadi kaban DAP ari 85 iku peranak Rh Romeo Munggu Demam.
Tuai Rumah Romeo Serit, ti nguluka tama ngagai parti DAP ba penerang iya madah, DAP nya dipilih sereta pelasar ti chukup engkeman ungkup sida laban DAP nya mega Kaban dalam Pakatan Harapan (PH) ke megai perintah besai.
Ku Tuai Rumah Romeo, Leon semak enggau sida lalu ngarapka iya(Leon) ulih ngenataika penanggul enggau peneka sida ngagai ketuai ba perintah besai..
Leon nambah, DAP Sri Aman ngelaluka kaban baru ari baruh pegai Tuai Rumah Romeo.
“Tuai Rumah Romeo siku orang ti bisi juluk ati sereta regas ba pekara pengelantang nembiak redak iya.
“Aku muji juluk ati iya ke enggai ditinggal ari arus politik ke alai sebagi besai pengelantang pendiau ungkup peranak menua pesisir nya datai ari perintah besai,” ku iya.