Anda di sini

Pilih bakih ke betul sereta manah enggau begulai: Safiee

 Safiee (duduk baris kedua, tengah) begambar begulai enggau semua pesereta Program Siri 4/2019 ‘Kawan Ku Sayang Keluarga Ku Kenang’ di Dewan SMK Toh Hajah Normah Daro bedau lama ke udah.
KE PENGINGAT: Safiee (duduk baris kedua, tengah) begambar begulai enggau semua pesereta Program Siri 4/2019 ‘Kawan Ku Sayang Keluarga Ku Kenang’ di Dewan SMK Toh Hajah Normah Daro bedau lama ke udah.

DARO: Bepelasarka penerang ari Opis Ngitung Penyampau Tubuh Sarawak 2019, penyampau raban nembiak ti beumur 15 nyentuk ke 39 taun bisi 1,249,000 juta iku orang tauka 43.45 peratus ari penyampau 2.8 juta peranak ke diau di Sarawak.

Kaban Kunsil Nengeri (ADUN) Daro, Safiee Ahmad madah, sida ke dalam kategori umur nya mudah napi mayuh macham pemar ke ngelingi enggau gaya ke maya hari tu.

“Ke bendar iya, raban tu mudah teparuk, terunda-runda lalu deka nguji enggau ngaul diri pengawa ti enda manah sereta enda berunding dulu sentang empas ti deka nyadi ba timpuh ke panjai.

“Kelebih agi ba pengidup sida jemah ila ari sukut pengerai, batang kereja, nama manah ruang bilik enggau komuniti,” ku iya.

Safiee madah munyi nya lebuh ke bejadika ‘Majlis Penangguhan Program’ Siri 4/2019 ‘Kawan Ku Sayang Keluarga Ku Kenang’ di Dewan Sekula Sekondari (SMK) Toh Hajah Normah Daro bedau lama udah.

Ku iya, entara kebuah mudah teparuk laban nitihka jaku ari bala bakih ke serebak, pengeran deka nguji enggau ngasaika utai ke baru.

“Daya idup tu nyata dipeda nengah mayuh kes baka kes salah nguna dadah, nginsap, enchuri, enggau pengawa jai bukai ti malut bala nembiak ti beumur 15 nyentuk ke 25 taun,” ku iya.

Nitih ku iya, ke bendar iya raban nembiak ba umur nya dilalau ngambika bejejimat lebuh ke milih kaban.

“Enti salah pilih, ujung iya ngemedis diri empu, laban nesal dudi nadai reti. Tu beguna bendar dikena ngubah diri kitai empu, diri sebilik enggau komuniti ngagai tuju gaya idup ti bepengerai, nyulut sereta lantang,” ku iya nambah.

Safiee ngarapka semua pesereta ulih bekunsi peneleba nengah program nya begulai enggau bala kaban sida ke bukai.

“Ngagai sida ti deka napi peresa SPM enggau STPM taun tu, kita patut nyikap diri empu enggau serius sereta chakah agi ngambika bulih pemutus ti nyulut. Pelajar nya tangga pemujur enggau penyamai pengidup kitai,” ku iya madah nyemetak.

Program nya ke diatur pengelama tiga hari udah disereta 145 iku raban nembiak ari kandang menua Daro.

Sama bisi ngulu program nya pengari Sekretari Mendam Opis Menteri Dagang Temuai, Seni, Main Asal, Nembiak Lumba enggau Main Paul Kawin Pipo enggau Penyanding Penemu ‘Program Kawan Ku Sayang Keluarga Ku Kenang’ Sulhie Saleh.