Anda di sini

Beserakup ngetanka Sarawak ari dikuasa orang luar, ku Minos

MINOS
MINOS

KUCHING: Rayat Sarawak enda ngira bansa patut beserakup ngetanka menua diri tauka dikuasa orang luar.

Setuju enggau jaku penerang Ketua Menteri di atas nya, Chairman Majlis Perbandaran Kota Samarahan (MPKS), Datuk Peter Minos madah,baka ke ditemu semua parti Semenanjung  semaya deka ngerampas perintah Sarawak ba pengawa bepilih nengeri (PRN) ti deka datai.

“Parti ari Semenanjung baka Parti Tindakan Demokratik (DAP), Parti Keadilan Rayat (PKR) sereta Parti Pribumi Bersatu (BERSATU) ari baruh Pakatan Harapan (PH) enggau tebuka madahka sida deka menang lalu nguasa perintah Sarawak ba PRN ti ditetapka kena 2021 tauka tumu agi ari nya.

“Sida amat bebendar lalu diatu bejalaika pengawa ngagai serata nengeri nengah penemuai, gempuru enggau chara ke bukai agi dikena nginti rayat.

“Rayat Sarawak patut serius beratika juluk ati PH tu lalu tanya diri empu sekalika deka ke deka parti enggau ketuai ari luar megai nengeri tu tauka  kitai deka ke parti enggau ketuai ari Sarawak terus megai nengeri tu,” ku iya madah ngagai Utusan Borneo.   

Tambah Minos, nyadi rayat Sarawak, iya ngasaika diri nyamai, likun sereta lantang diperintah parti politik enggau ketuai ari Sarawak empu.

“Kitai gaga amat ati enggau pengelikun ba jalai pengarap sereta bansa ke endang udah bisi di Sarawak diatu.

“Kitai enggaika pekara ke manah ti benung diasai kitai diatu berubah lalu dikachau ketegal penama orang ari luar enggau daya idup sida ke nyelai,” pia ku Minos.

Ku Minos  baru, taja pan Sarawak enda nerima penama parti enggau ketuai luar tang ukai reti nya rayat di nengeri tu enda sayauka menua Malaysia.

Tang ku iya, rayat Sarawak deka ke nengeri tu meruan baka selama baka ti diasai kitai ke diatu, iya nya nengeri ti likun, lantang sereta nyamai endur diau.

“Gaya nengeri tu jemah ila deka ditentuka enda lama agi ba pengawa bepilih nengeri ti deka datai.

“Nya alai, rayat Sarawak patut ngaga pemutus ke pintar enggau memanah nentuka perintah ke ulih megai nengeri tu,” ku iya.