Anda di sini

Beri sukung ngagai GPS, KM ba PRN ke deka datai

KAPIT: Penyanding Penemu ba Opis Kepala Menteri, Datuk Alexander Nanta Linggi bedau lama udah bejadi program Ketuai Begulai enggau Rayat ke diatur ba Rumah Ngindang, Nanga Lun Ulu Sungai Bena, Sut, Baleh ditu.

Sama bisi ngulu pengawa nya Sekretari Politik ba Opis Kepala Menteri Sarawak, Tapah Ata enggau pemesai Pengatur Pengawa ba Opis Pelilih Kapit Bidah Lujah, bala ketuai opis enggau bala tuai raban bansa sekeda bala ke bisi begempuru ba ruai Rumah Ngindang alai program nya diatur.

Bejaku ba program nya, Nanta ke mega kaban Parlimen Kapit minta ngagai mensia mayuh meri sukung penuh ngagai Perintah GPS enggau Kepala Menteri Abang Johari laban iya siku Kepala Menteri ti nyaga sereta nemu peneka rayat Sarawak.

Ku iya, kenyau ari Abang Johari nyadi Kepala Menteri dalam taun 2017, iya ngaga ubah ngenyit dikena nyaga semua rayat Sarawak, enda milih sekalika di mengeri tauka menua pesisir. Lebuh iya nemuai ke Kapit bedau lama iya ke nyadi Kepala Menteri, iya udah setuju numbuhka Ejensi Pemansang Ulu Rajang (URDA) ke pemaik enggau meri penguntung ngagai rayat di ulu Rajang.

Iya ukai semina numbuhka URDA, tang mega meri kuasa ngagai pengari rayat di menua pesisir. URDA diungkupka  belanja. Sekeda projek udah dibuka tinda. Sekeda projek mega udah diberi ngagai kompeni ke mujur diberi tinda lalu bejalaika pengawa ke ngaga projek nya.  

Perintah GPS ku Nanta, siti gempung perintah di nengeri tu diatu, GPS betuaika Johari sereta ngembuan tuju ke baru.  

Iya madah, PH ari baruh pegai Tun Mahatir ti nyadi Perintah Besai, iya deka ke kaul ti manah. PH ba tikas perintah besai, tang ba tikas nengeri kami deka ke perintah GPS. Nya singkang ke betul. Kenyau perintah besai dipegai PH, aram kitai bekerejasama enggau sida ngaga nama ti kedeka sida lalu meri semua utai betul.   

Ba Pengawa Bepilih Nengeri ke deka datai, iya minta semua peranak Sarawak nyukung GPS laban nya parti Sarawak lalu Johari nyendiaka kitai semua kuing ke betul. Iya nguluka kitai nuju jalai ke betul, nya alai sukung mih GPS ba pengawa bepilih nengeri ti  deka datai.

Iya minta ngagai semua rayat ba pengawa bepilih nengeri ti deka datai nyukung chalun GPS; Pelagus ngundi  Wilson Nyabong Ijang, Bukit Goram ngundi Jefferson Jamit Unyat enggau Baleh ngundi Sapit Kepala Menteri Sarawak Tan Sri Datuk Amar Dr James Jemut Masing.

Berebak enggau nya, Nanta nyuaka geran chek MRP ngagai JKKK rumah panjai ke dalam kandang menua Sut lalu ke mega dalam Parlimen Kapit.