Anda di sini

Bebasaka pemutus Dr Jerip, ku Fatimah

Dato Sri Fatimah Abdullah
Dato Sri Fatimah Abdullah

KUCHING: Pemutus Menteri Muda Perengka Pengangkut Datuk Dr Jerip Susil ti pansut ari Parti Sarawak Bersatu (PSB) pemutus ti tusah digaga iya sereta patut diterima semua orang.

Ketuai Raban Orang Indu Parti Pesaka Bumiputera Bersatu (PBB) Dato Sri Fatimah Abdullah madah, nya pemutus ti udah digaga ulih Dr Jerip laban iya chukup ngemeratka rayat lebih agi raban bansa Bidayuh.

"Iya (Dr Jerip) udah ngaga pemutus, kitai patut nerima pemutus nya laban nya pemutus ke digaga iya empu.

"Bepelasarka penerang berita iya (Dr Jerip), iya madah nya siti pemutus ti tusah deka digaga tang pengudah berunding enggau orang ba sitak ke diarika iya ngasaika pemutus ke patut digaga iya nya meri servis ngagai rayat ba sitak nya sereta kepenyerakup raban bansa Bidayuh," ku iya lebuh dikerandau raban pemberita.

Dulu ari nya Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit nya nyadi chairman aum Majlis Tertinggi raban orang indu PBB  ti diatur ba Indu Opis PBB ditu, sehari tu. 

Nambahka nya ditanya pemberita sekalika Dr Jerip ti nyadi Kaban Kunsil Nengeri (ADUN) Mambong sekalika deka nyereta parti bukai, Fatimah madahka, nya patut ditanya ngagai iya empu.

Tang ku Fatimah naka ke sehari tu bisi parti dalam serakup Gabungan Parti Sarawak (GPS) nukangka pintu ngagai Dr Jerip.

"Sehari tu aku bisi macha ba surat kabar iya nya Parti Demokratik Progresif (PDP) Datuk Henry Jinep (ADUN ti mega naib presiden parti nya) udah nukangka pintu ngagai iya (Dr Jerip)," ku iya arap bendar Dr Jerip ti ngaga sebarang pemutus pengudah berunding panjai.

Kemari, Dr Jerip madahka diri pansut ari PSB tekala nya, lalu pekara nya ditukuka iya nengah surat rasmi ngelengkaka pangku pengawa iya ari nya.

Dr Jerip ti mega sapit presiden PSB nengah surat nya madah, nya pemutus iya pengudah ngira penemu enggau lalau penyukung nyengkaum rayat ba sitak DUN Mambong.