KUCHING: Gerempung Apai Indai enggau Pengajar (PIBG) nyadi kedap besai dikena mantu ngarak sekula ngemansangka modal mensia dalam mayuh pekara baka akdemik, lumba enggau main sereta ulah nembiak.
Kaban Kunsil Nengeri (ADUN) Engkilili, Dr Johnichal Rayong Ngipa madahka PIBG patut nyerakupka semua apai indai, pengajar sereta komuniti dikena ngemajuka sesebuah sekula baka SMK Engkilili.
“Enda ngira pupu bansa baka Iban, China, Melayu, Bidayuh enggau bansa bukai ti nyadi kaban PIBG nyadika penegap tauka pengering sekula nyengkaum SMK Engkilili.
“PIBG udah dikearap ngetanka pemaik enggau pengelantang pengidup dalam perugan ti mayuh adat enggau main asal, jalai pengarap enggau bansa.
“Dikearapka PIBG enggai sekula terus liat ati ngangkatka kerejasama enggau anak bansa ngambika raban bansa ba kandang menua Engkilili enggau Lubok Antu enda tinggal ari segang pemansang,” ku iya.
Iya mansutka pekara nya lebuh ti bejadika aum besai ninting taun PIBG enggau bejadika ‘Hari Permuafakatan Akademik’ SMK Engkilili Taun 2019 ti diatur apin lama, ba Dewan Tiang Laju, SMK Engkilili, Sri Aman.
Berebak enggau tu iya ngelalau PIBG SMK Engkilili patut chakah enggau regas natur aktiviti sereta mekuh ngagai pengawa ngemansangka akademik enggau ulah nembiak enggau modal mensia.
“Nya alai apai indai patut ngatur program ke ulih ngumpul belanja baka pengerami merarau PIBG, Hari PIBG Begulai enggau Mensia Mayuh sereta ke bukai.
“Lalu belanja nya diberi PIBG ngagai sekula dikena ngelanggur program ke ulih meri pangka ti manah ngagai semua raban sekula SMK Engkilili,” ku iya.
Berebak enggau tu lebuh ti ngenang Hari Permuafakatan Akademik PIBG sekula nya, Rayong madahka tuju program nya dikena meri awak ngagai bala pengajar berandau enggau apai indai sereta anak pasal pemutus peresa tengan taun 2019.
“Nengah Hari Permuafakatan tu kitai ulih ngiga chara mutar sereta ngiga jalai ngangkatka prestasi subjek ti kurang manah ba pemutus,” ku iya seraya ngarapka sekula nya ulih sebaka enggau sekula bukai ke nyulut.
Sama bisi ba pengerami nya Prinsipal SMK Engkilili Pengajar Dickson Palot enggau ke bukai.