BINTULU: Lebih 500 iku kaban ukai eksekutif Petronas Kaban Gerempung Pekereja Petroliam Nasional Berhad (KAPENAS) Bintulu udah nyereta gempuru likun ba mua opis Petronas di Naim Bintulu Paragon, ensanus.
Sekeda bala ke bisi datai ba pengawa tu iya nya presiden Kapenas Sarawak Musa Bakri Ibrahim, chairman Malaysian Trades Union Congress (MTUC) Sarawak Mohamad Ibrahim Hamid enggau Sekretari iya, Andrew Lo.
Musa lebuh dikerandau madah pengawa begempuru likun tu diatur dikena mantah opis pengatur pengawa Petronas ke enggai ibuhka semua batang langgur ari Kapenas Sarawak.
Pekara ke beguna amat ku iya opis pengatur pengawa Petronas enggai ngemasukka Kuasa Kereja ke dalam Sempekat Kolektif.
Berebak enggau nya, Ibrahim madahka kuasa kereja nya sebengkah ari isu, ba iya batang isu iya nya sentang gaji ke diberi baruh agi ari Semenanjung enggau Sabah.
Kelimpah ari nya, Andrew Lo madah berindik enggau pemeri kuasa,gerempung nya nyukung tang opis pengatur kereja Petronas meseti bisi tanggungpengawa.
“Kitai enda ulih bebatak asur agi, tu keterubah lalu ukai kepenudi, MTU Sarawak deka nyukung lalu enti bisi pematut ke ngatur gempuru likun ba Petronas Twin Tower.
“Kitai udah suah berunding enggau orang ke ngaduka nya, tang respon ari sida sama aja, sida enggai dibai enggau berunding.
“Tu ukai semina isu Petronas aja, tang ke diatu isu Sarawak, nya kebuah MTUC bediri tegap dibelakang sida,” ku Lo.