KUCHING: Sapit Kepala Menteri, Datuk Amar Douglas Uggah Embas mantaika pengirau ati diri meda ulah kelalu balat ngirup arak enggau gian dadah majak nyadi di menua pesisir.
Uggah ke mega Menteri Betanam Betupi Moden, Tanah Adat enggau Pemansang Kandang Menua madah, jalai alun ke majak manah ngagai kandang menua dipelaba nyadi ke batang kebuah bemacham bansa arak enggau dadah muntang dibai ngagai sida din.
“Tu dipelaba nyadi ketegal tikas pengidup rayat ke manah agi sereta sambung jalai alun ke manah berindik ari polisi perintah ke manah,” ku iya.
“Lalu lebuh rega sawit enggau lada ba ikas ke chukup manah, mayuh sida tu tauka anak sida ulih mayuh utai,” ku iya nambah.
Tu ngujungka ulah balat ngirup arak enggau gian dadah nyadi ba sekeda nembiak di menua pesisir, ku iya lebuh bejadi Randau Pemansang Ramake diatur Kaunsil Pemansang Rama Nengeri ba Rumah Dau Gandau di Temedak Ulu Spak, Betong kemari.
“Dalam bulan tu, ambika chunto, bisi dua penusah bebadi ba jalai alun ti nabanka nyawa nembiak ti dipadahka ketegal mabuk,” ku iya.
Iya arapka Kaunsil Pemansang Rama ulih mantu ngiga chara dikena mutarka penanggul tu.
“Aku deka mantaika langgur penemu ngambika program ‘anti’ ngirup arak enggau gian dadah dipunka ba renggat sekula primari. Aram kitai ngiri runding rebak biak ngambika sida iya enggai nginsap, gian dadah enggau balat ngirup arak.”
“Sama mega, kitai patut ngajar rebak biak ngambika bejejaga ari ulah dipejal beleman ngambika sia ngeripot nya ngagai opis ke bekaul nyemaka bisi nyadi ba sida, lalu aram mih kitai berandau enggau apai indai sida mega,” ku Uggah ke naydi Kaban Kunsil Nengeri Bukit Saban.
Siti agi penanggul rama ti mesti dipunaska iya nya nembiak betubuh bisi, ku iya.
“Penanggul tu nyadi ketegal lemi ba disiplin enggau kemata ari apai indai,” ku iya.
Pengari rayat deka berasai gaga endar ati mantu ngatur program dikena mutarka semua penanggul rama tu, ku iya.
“Kami ulih ngasuh raban ari kami ngemujurka program nya,” ku iya.
Nerebak enggau nya, MP Betong Datuk Robert Lawson Chuat lebuh ke bejaku madahka randau nya beguna amat.
Iya mega berasai gaga ati meda penatai bala tuai rumah enggau apai indai ngulu program nya.
“Sida ti tuai tau ngelalau bala nembiak ngambika ngenyauhka diri ari penanggul nya nengah penemu ke diulih sida,” ku iya.
Kaban Kunsil Nengri Layar, Gerald Rentap Jabu mega mantai pengirau ati iya ba pekara nya lebuh iya ke bejaku.
Sama bisi ngulu pengerami nya, Sektretari Eksekutif Kaunsil Dr Zufar Yadi Brendan Abdullah.