Anda di sini

Konsep nerima pengabang maya pengerami besai mesti diteruska

Advertisement
 Temuai dipebasa begambar begulai enggau komiti pengatur.
KE ALBUM: Temuai dipebasa begambar begulai enggau komiti pengatur.

BETONG: Konsep nerima pengabang ba pengerami besai di nengeri tu ke dikerami begulai enggau pupu bansa sereta jalai pengarap enda tau enda dipajak ke pemaik semua.

Kaban Parlimen Betong, Datuk Robert Lawson Chuat madah, pengerichah agi diasai sereta diintu dalam pengelikun beguna amat dikena negapka tanggam kaul enggau diri sebilik.    

Ku iya, ngasuh balat berasai temegah ati laban ulah nerima pengabang ti dikemeranka raban bansa di Sarawak tu maya bisi pengerami richah sereta likun.

“Penyerakup tu mih ngasuh kitai semak enggau pangan diri baka diri sebilik taja pan begulai dalam pupu bansa enggau jalai pengarap.  

“Pengerapit kaul nya siti pengelebih ti bisi di Sarawak sereta patut ditanka,” ku iya.

Iya bejaku munyi nya maya ngarika Sapit Kepala Menteri Datuk Amar Douglas Uggah Embas bejadi pengerami ‘Ramah Tamah Aidilfitri’ Kampung Melayu Betong ti diatur ba Dewan Panglima Rentap Betong ditu malam kemari.

Urung 500 iku peranak Kampung Melayu Betong ngulu pengerami nya ke diatur Komiti ‘Ramah Tamah’ Kampung Melayu Betong ke mega nyadi pengerami ninting taun.

Bisi 15 buah bansal bejual udah disediaka NGO enggau serakup ke bisi ba Kampung Melayu Betong ngena agih belanja ke diberi dikena ngenah temuai ke datai.

Ba pengerami nya, bisi 34 iku nembiak ke nyulut ba peresa UPSR, PT3, SPM, STPM, Diploma enggau Universiti ba taun 2018 udah nerima insentif ari komiti nya ngambika nyadi ke peransang ngagai sida dalam pelajar.

Berebak enggau nya, Robert mega bisi ngungkupka pemeri RM5,000 ngagai wang turu pelajar Kampung Melayu Betong ngambi tau nyadika peransang ngagai sida.

Sama bisi ngulu pengerami ADUN Layar, Gerald Rentap Jabu, Residen Bagi Menua Betong, Friday Belik, DO Betong, Sofhi Jebal, Tan Sri Empiang Jabu, bala ketuai opis enggau raban bansa.

Advertisement