BINTULU: Menua ASEAN ba Kandang Menua Penumbuh ASEAN Timur Brunei, Indonesia, Malaysia enggau Filipina (BIMP-EAGA) deka ngatur gempuru ‘BIMP-EAGA’ kena bulan November taun tu ba Sarawak lalu mandangka pengandal ASEAN sentang prestasi ti chukup manah nengeri tu ari sukut pemansang ekonomi, penegap penyerakup ti nyadi pelasar positif ungkup rantau tu.
Kepala Menteri Datuk Patinggi Abang Johari Tun Openg ke baru pulai ari Bangkok sepengudah ngulu Gempuru ASEAN begulai enggau raban Menteri Besai Malaysia, Tun Dr Mahathir Mohamad ti mungkur kerejasama Malaysia, Indonesia, Filipina enggau Brunei dalam BIMP-EAGA pengelama 25 taun madah, peminta ti ngasuh nyadi tuai pengatur program nya nyadika siti tanda basa menua ASEAN kelebih agi BIMP-EAGA ungkup nengeri Sarawak.
“Aku ngarika semua (rayat Sarawak) nerima peminta nya laban Sarawak bisi prestasi ti chukup manah ari sukut pemansang ekonomi, penyerakup ti tegap, nyadi negeri ti entap ke ulih bejalaika pengawa ti positif ngagai pemansang rantau tu nyengkaum Indonesia enggau Brunei Darussalam,” ku iya.
Iya bejaku munyi nya ba pengerami Gawai Dayak enggau ‘Ramah Tamah Aidilfitri’ sereta ngelancharka GPS Renggat Kunsil Nengeri (DUN) Jepak ba Taman Rekreasyen Jepak, malam ensanus.
Ku iya, pengandal nya siti basa ngagai kitai laban dunya ngakun pengawa nengeri Sarawak enggau menua ke besemak meda penau Sarawak ngemansangka ekonomi sama tikas enggau pemansang sekeda menua ke bisi di dunya tu lalu Bank Pemansang ASEAN (ADB) mega ngakun penau Sarawak.
“Kitai bekerejasama enggau Indonesia nengah char mekal elektrik ngagai menua nya lalu nya mandangka ekonomi kitai manah sereta mandangka GPS enggau bala ketuai Sarawak bisi standard tinggi,” ku iya.
Ketegal nya ku iya, orang papaska kitai laban kitai bisi penatai pemisi ti manah nyentuk ke kitai dipadahka deka bankrap dalam timpuh tiga taun ti deka datai.
Iya bechuntoka enggau gaya pemansang di Bintulu ti dipejalaika perintah nengeri enggau chukup manah, lalu siti ari nya ngaga jematan meraka ngagai Kampung Jepak ke deka berengkah digaga kena 22 Julai taun tu.
Taja pan ungkus nya besai nyauka manggai RM400 juta tang ku iya, jematan ikonik Kemena ti nyambung Jepak enggau pasar Bintulu deka digaga ngena belanja ari perintah nengeri empu.
“Kitai bisi duit, aku ngiga duit ketegal nya orang pedis ati laban Sarawak baka mutiara di Malaysia. (Sarawak) Baka anak dara ti bajik, lalu sida deka nanya anak dara kitai nyentuk ke nyebut kitai deka bankrap tang jaku tuduh nya jauh sekali, lalu belanja tambah mega bisi,” ku iya nambah.
Berebak enggau nya iya mega madah, ujung taun tu aku deka madahka chara baru dikena nambah belanja nengeri Sarawak lalu aku terus terang ditu, kitai nadai utang lalu taun tu kitai bisi bajet lebih ti nyadi kebuah Sarawak diperebut nyentuk ke bisi pengawa deka mambarka nengeri tu.
Sama bisi nyempulang iya, Datuk Amar Juma’ani Tuanku Bujang, Ex-Kepala Menteri Sarawak ti mega Penyanding Penemu Pansik Sains Sarawak Datuk Patinggi Tan Sri Alfred Jabu Numpang, Menteri ba Opis Kepala Menteri (Integriti enggau Ombudsman) ke nyadi Kaban Kunsil Nengeri (ADUN) Jepak Datuk Talib Zulpilip enggau Datin Dr Zaliha Abdullah, Menteri Bekal Ai enggau Elektrik ke mega ADUN Kemena Dato Sri Dr Stephen Rundi Utom, Menteri Muda Jalai Tebing Pantai Datuk Julaihi Narawi, Kaban Parlimen Petra Jaya Datuk Seri Fadillah Yusof, Kaban Parlimen Bintulu Datuk Seri Tiong King Sing, ADUN Samalaju Majang Renggi, Chairman Pengatur Shamsuddin Abd Razak, ketuai enggau pengari komponen parti GPS, bala ketuai opis enggau bala ketuai raban bansa.